Reportajen Silvino Freitas
Nonu governu konstituisional ne’ebé lidera husi Primeiru Ministro Xanana Gusmão organiza reuniaun ba jornada orsamental tinan 2027 nune’e orsamentu estadu tinan 2027 sai roteiru foun husi governu atu alkansa meta sira ne’ebé estabelese iha Planu Estratejiku Dezenvolvimento (PED) ne’ebé aprova iha 2011.
Primeiru Ministro Xanana Gusmão dehan, Orsamentu Estadu ba 2027 sei hanesan primeiru orsamentu husi Kuadru Planeamentu ba Médiu Prazu 2027-2030, ne’e hanesan roteiru foun ida husi Governu atu alkansa meta sira ne’ebé estabelese ona iha Planu Estratéjiku Dezenvolvimentu, aprovadu iha 2011 nune’e, orsamentu ida-ne’e hakarak koloka ho forma ne’ebé metin liután iha dalan loos, atu bele atinje estatutu hanesan país ho rendimentu médiu-altu to’o 2030, nunee Orsamentu ba 2027 sei determinante mós atu diversifika ekonomia naun petrolífera no promove kreximentu ida ne’ebé inkluzivu liu, ne’ebé apoia mós hosi Polítika kona-ba Ekonomia Azul 2025–2035 no hosi integrasaun tomak iha ASEAN, ho kompromisus nasionais seluk.
“Orsamentu Estadu 2027 nian sei orienta ho tema Reforsa Reziliénsia Liuhusi Transformasaun: Diversifika Ekonomia ba Futuru ne’ebé Sustentável atu transforma ita-nia reziliénsia ba investimentus iha setores produtivus estratéjikus, iha infraestruturas ho kualidade, iha konetividade ho asesu ba servisus bázikus, no iha fortalesimentu kapital umanu nasional” dehan PM Xanana Gusmão iha ambitu abertura ba jornada orsamental tinan 2027 iha salaun Ministeriu Finansa Ai-tarak laran, (12/06).
PM Xanana informa, governu tenke hahú ho avaliasaun ida ne’ebé onesta kona-ba situasaun atual no monitorizasaun ba Planu Estratéjiku Dezenvolvimentu hatudu katak, husi 199 metas definidas, barak mak foin rejista progresus parsiais no balu la hatudu kualker avansu maskí utiliza ona rekursus públikus boot, maibé rezultadus ba sidadaun sira no ba ekonomia nasaun nian la evolui tuir ritmu ne’ebé governu hakarak, nune’e governu kontinua rekorre ba forma ida uluk hodi elabora orsamentu, mak nasaun sei hasoru risku hanesan esgota (ka, hamohu) Fundu Petrolíferu sein bele konkretiza transformasaun estrutural ne’ebé ba povu no nasaun.
“Tanba razaun ida-ne’e, mak Orsamentu Estadu 2027 nian sei hanesan mós teste boot dahuluk ba prosesu orsamental foun Ministériu Finansas delineia ona aspetus téknikus” informa xefi governu Xanana Gusmão.
PM Xanana konklui katak, hanesan xefi governu nafatin tau esperansa ba kada Membru Governu atu bele analiza ho kuidadu nia programas hodi identifika atividades ne’ebé ho baixa prioridade, baixu impaktu ka dezempeñu ne’ebé insatisfatóriu nafatin, no atu imi hotu preparadus atu reduz ou halakon tiha, hodi kria espasu orsamental ba prioridades ne’ebé aas liu nune’e Sustentabilidade orsamental la’ós de’it responsabilidade Ministériu Finansas nian maibé depende ba desizoens ne’ebé foti iha ministériu sira hotu.
“Liuhusi Orsamentu Estadu 2027, ita tenke hatudu katak ita-nia instituisaun sira bele alkansa rezultadu hirak-ne’e ho dixiplina, transparénsia no unidade iha propózitu” konklui PM Xanana Gusmão.