Reportajen Silvino Freitas
Prezidente Parlamentu Nasionál Maria Fernanda Lay konsidera eis Prezidente da Republika saudozu Francisco Guterres ‘Lu-Olo’ hanesan riku soin nasaun nian, nune’e falesimentu saudozu nian nasaun lakon nia figura di’ak tebes, ne’ebé rai mos memoria iha momentu difisil nia lidera parlamentu nasionál nune’e husi nia lideransa ho memoria bele hatudu ezemplu di’ak atu deputadu sira bele respeita malu no hametin demokrasia.
Prezidente Parlamentu Nasionál Maria Fernanda Lay dehan, saudozu eis Prezidente da Republika Francisco Guterres Lu Olo laos riku soin ba família de’it maibé riku soin nasaun nian nune’e nasaun hamutuk ho família no partido lakon figura diak ida tan nee nia triste tebes no konserteza estadu sei tau matan ba saudozu nia oan sira sira.
“Hau hanoin ohin hau hateten aset estadu quer dizer saida maka matebian husik ona ita sira jerasaun tuir mai no ami sira neebe fo kontinuidade valoriza tebes tebes” dehan prezidente parlamentu nasionál Maria Fernanda Lay hafoin presta omenajen ikus ba saudozu eis Prezidente da Republika Francisco Guterres Lu Olo iha nia rezidensia Faról, (23/06).
Nia kontesta tan katak, saudozu ema ne’ebé iha kapasidade di’ak iha momentu difisil konsege lidera parlamentu nasionál no memoria ne’e sira ne’ebé dadaun haknaar an hanesan deputadu tenke konsidera nafatin iha prosesu lejislasaun no hatudu mos atitudi ne’ebé ho ezemplu di’ak iha momentu ne’ebé nia lidera parlamentu nasionál.
“hau espera nia figura bele inspira ami para hodi bele respeita malu iha parlamentu nee importante tebes, hau fiar katak matebian sei kontente bainhira ami mos servisu ho diak no mantein demokrasia neebe durante nee sai preokupasaun ba povu timor leste” dehan prezidente parlamentu nasionál Maria Fernanda Lay.
Nune’e, falesimentu eis Prezidente da Republika Francisco Guterres “Lu-Olo” nasaun lakon boot ba nia riku soin no memoria ne’ebé saudozu husik hela sei mantein nafatin ba futuru nasaun nian.