Reportajen David da Costa
Eis Titulár Taur Matan Ruak afirma katak maske Timor-Leste lakon lider istóriku ida ho partida Francisco Guterres Lú-Olo, ninia legadu ka kontribuisaun valores no mensajen importante sira, liu-liu kona-ba unidade nasional, kombate korupsaun no servisu ba povu, sei moris nafatin no sai orientasaun ba jerasaun foun sira atu kontinua lori nasaun ba oin.
Iha okaziaun lutu nasional ba Saudozu Eis Prezidente Francisco Guterres Lú-Olo, Eis Primeiru-Ministru no eis Prezidente República, Taur Matan Ruak, hateten katak Timor-Leste lakon figura boot ida ne’ebé durante ne’e kontribui maka’as ba luta libertasaun no dezenvolvimentu nasaun. Lú-Olo hanesan ema ida ne’ebé determinadu, disiplinadu no sempre kumpri nia responsabilidade ba povu no nasaun.
“Timor lakon boot, Timor lakon ema di’ak ida, maun Lú Olo ema ida ne’ebé sente determinadu, disiplinadu, kumpri, entaun ita lakon. Maibé dalan mak ne’e hotu, ne’ebé obrigadu ba maun Lú tanba nia kontribui fó hela Timor ba ita hotu, liu-liu ba ita nia jerasaun sira tuir mai. Ita ne’ebé moris tuir nafatin, banati tuir nafatin hahalok ne’e lori ita nia nasaun ba oin,” dehan Eis Titulár Taur Matan Ruak ba Jornalista sira iha rezidénsia Saudozu Lú-Olo iha Faról, Tersa 23/06.
Taur Matan Ruak salienta katak maske Lú-Olo husik ona mundu ne’e, nia legadu no mensajen sira sei hela nafatin ba jerasaun foun sira atu kontinua. Nia apela ba povu tomak atu banati tuir valor no hahalok di’ak ne’ebé Lú-Olo hatudu durante nia moris, liu-liu iha esforsu kombate mukit, kiak, dezempregu no mizeria hodi lori Timor-Leste ba oin.
“Ita sira moris ne’e kontinua lori ita nia rai ba oin, tanba ba nia hotu ona, ba ita todan sei iha. Buat hotu ne’ebé nia iha ne’e tutur lisuk, sasan sira nia husik hela, nia agora tau hela ba ita sira moris ne’e, liu-liu imi sira jerasaun foun ne’e, ne’e imi nia tempu ona,” nia subliña.
Iha nia mensajen, Taur Matan Ruak mos hato’o sentidu kondolénsia profunda ba família enlutada, inklui kaben no oan sira, no afirma katak sira la mesak tanba povu Timor-Leste tomak sente hanesan família ida. Nia rekordasaun ikus kona-ba enkontru ho Lú-Olo iha Malázia sai momentu ida ne’ebé emosional, bainhira nia despede no garante katak kompaneiru sira sei la haluha nia.
“Ami hotu mai husi ailaran ho nia, espera ami nia sentimentu kondelensia profunda boot ba nia kaben, nia oan sira. Sira la mesak. Ami na’in rua ba hamutuk ba hotu hospitál, nia hela ha’u fila. Antes ha’u filas ha’u despede, ha’u hatete ba nia katak, ami hotu iha la haluha nia, hamutuk nia nafatin. Saida de’it mak mai simu. Finalmente nia hakuak ikus fó ba nia iha Malázia. Ne’e ne’ebé nia ba ona, husu obrigadu, destinu hanesan ne’e duni. Ita sira ne’ebé moris forsa nafatin,” nia hateten.
Taur Matan Ruak mos lembra katak durante nia mandatu hanesan Prezidente República, Lú-Olo fó atensaun boot ba luta hasoru korupsaun no insisti katak lider no instituisaun sira tenke servisu ho integridade ba interese povu nian. Nune’e, nia husik hela responsabilidade ba jerasaun atual no futura atu kontinua realiza mehi no aspirasaun sira ne’ebé nia luta ba durante tinan barak.
“Mensajen ida ne’ebé durante mandatu eis Prezidente Saudozu Lú Olo nia apela tebe-tebes ba iha kombate korupsaun. Saida mak reprezenta bainhira nia husik Timor-Leste. Ne’e hela ba ita moris sira atu hatutan. mensajen sira ne’ebé fó hela. Konserteja nia funu ita, nune’e ita labele toba, hader nafatin, buat hotu ne’ebé la di’ak, la kontribui ba dezenvolvimentu ita nia rain, ita tenke halakon.
Nia remata ho apelu ida ba povu Timor-Leste atu kontinua hametin unidade nasional, hadomi nasaun no hader nafatin hasoru buat hotu ne’ebé bele impede dezenvolvimentu país, hanesan forma ida atu honra no kontinua legadu politik no patriótiku ne’ebé Saudozu Lú-Olo husik hela ba Timor-Leste.
