Reportajen Zevonia & David
Situasaun saúde iha rai laran, ne’ebe hamosu kritika barak husi sidadaun sira liu husi plataforma sosial media, no espasu ne’ebe limita jornalista sira atu halo entrevista ho dotor sira, atu hetan informasaun relasiona ho moras sira ne’ebe presiza tau atensaun publiku nian, iha loron seminariu nasional organiza husi Asosiasaun professional saúde sira ho tema “ Implementasaun regime kareira dos professional saúde, iha kontestu estadu de direitu demokrátiku”, iha loron 14 Dezembru 2024, iha salaun CNE,
Bainhira Neon Metin halo entrevista ho Provedor Direitu Umanus no Justisa, Virgilio da Silva Guterres hodi hare husi perspetiva direitu umanus nian, konaba limitasaun Doutor/a sira atu halo entrevista ho jornalista sira, Provedor Virgilio hatan kada Ministériu iha idak-idak nia estratéjia komunikasaun, hodi hato’o ba públiku, maibé se hare husi aspetu direitu umanus nian, tenke iha ema ida atu koalia ba públiku, konaba serbisu saúde nian, laos bandu dotor sira ko’alia, depois ita mos la koalia buat ida.
“Ministra la ko’alia, Diretór ospitál la ko’alia depois se mak ko’alia? Dotor sira nia serbisu prinsipál mak halo tratamentu ba ema laos atu koalia, nee dalaruma los, maibe se situasaun ka atendimentu iha ospitál, ka aimoruk laiha, ekipamentu laiha ida ne’e tenke iha ema ruma atu esplika, se ita lakohi professional saúde ka dotor sira atu koalia, entaun tenke iha portavoz atu koalia ba públiku, tanba públiku iha direitu atu hatene, konaba saida mak akontese”, dehan Provedór Virgilia ba Neon Metin.
Nia haforsa tan katak maske lei bele bandu funsionáriu públiku atu labele ko’alia, tanba iha limitasaun atu ko’alia konaba serbisu nian, maibe tenke iha ema ida ne’ebe designada atu fo informasaun ba públiku, bainhira jornalista sira husu tenke prontu fo.
Asuntu ne’e Neon Metin foti, tanba Neon Metin tenta halo aprosimasaun ho dotor/a sira, atu fo informasaun sira relasiona ho saúde públiku, hanesan kazu mall nutrisaun, mortalidade inan isin rua no bebe, kondisaun ospitál ne’ebe la adekuadu, hodi halo tratamentu ba pasiente sira, maibe professional saúde sira ne’ebe halo serbisu ba estadu, la prontu atu informasaun ba jornalista sira, tanba kestaun hetan limitasaun ka bandu husi lideransa saúde nian.
Portantu iha entrevista ho Vise Primeiru Ministru, Ministru Koordenador Assuntos Sociais, Ministru Desenvolvimento Rural e Habitasaun Komunitária, Mariano Assanami Sabino iha fatin hanesan, nia dehan Nonu Governu tau importánsia ba setor edukasaun no saúde, labele iha opozisaun iha setór refere, partidu ne’ebe deit mak lidera governu tenke apoia para serbisu ne’e lao no presiza professional katak presiza iha konsensu husi polítiku nain sira.
Iha Orsamentu Jeral Estadu 2025, governu investe iha setor saúde ho 6.2%, no Assanami hateten tinan oin governu foka ba iha infraestrutura hadia ospitál no klínika sira.
Alende ne’e Eis Ministru Saude, Dr. Rui Araujo ba Neon Metin hateten katak, solusaun ne’ebe diak liu mak governu presiza investe liután iha ekipamentus, no fasilidade sira hodi nune bele loke oportunidade ne’ebe diak liután ba professional saúde sira, atu bele halo sira atendimentu ba pasiente sira, ho diak liután
