Reportazen Zevonia Vieira
Surtu virus Corona ne’ebe mak to’o ohin loron ema hotu preokupa, tanba numeru maskra iha loza ka farmasia komesa la faan tanba laiha ona.
Hosi preokupasaun hosi ne’e portavoz Centru Integradu Jestaun Krize [CIJK], 07/03, Dr. Rui Araujo hateten konaba maskra iha komunidade nia leet, iha preokupasaun boot konaba maskra no iha lamentasaun barak katak atu hetan susar.
Dr. Rui hateten CIJK hakarak hatoo ba publiku katak maskra ne’ebe agora uza iha fatin-fatin mak maskra Cirúrgicas, maskra refere tuir lolos professional de saude sira mak uza ,maibe iha situasaun epidemia no pandemia hanesan agora, apela mos ba publiku atu uza, bainhira stock laiha, ih nasaun barak no World Health Organization [WHO] hanesan autoridade ne’ebe hare saude iha mundu tomak, rekomenda maskra Cirúrgicas sira ne’e bainhira la presiza, rezerva ba profesional saude sira mak uza, hodi nune bele halo atendimentu ba publiku ne’ebe diak.
Dr. Rui apela ba populasaun tomak katak prinsipiu uza maskra ne’e, tenke nafatin adopta wainhira laiha maskra Cirúrgicas, bele uza maskra kazeira ka maskra ne’ebe halo iha uma katak maskra ne’ebe ema suku rasik, uza elastiku no hena algudaun.
Konaba utilizasaun maskra ho loloos, liu hosi konferensia imprensa, Dr. Rui esplika hatoo ba publiku katak liu-liu maskra Cirúrgicas no mos maskra kazeira, prinsipiu importante mak antes uza maskra tenke fase liman ho sabaun, depois maskra nia oin labele kaer, ba maskra Cirúrgicas bainhira bokong ona, tenke troka tanba uza dala ida deit.
“Se bokong ona mak uza fali bele provoka buat seluk, tanba saida mak ita labele kaer maskra, tanba se virus ne’e iha ita nia liman, ita bele lori fali virus sira ne’e ba matan, ibun ka inus. Ba maskra Kazeira loron-loron tenke fase”, esplika Dr. Rui iha CCD, 07/04