Reportazen Santin Lucia da Costa
Merkadu Taibesi rehabilita ona haris fatin hamutuk 34, fundus hosi Oganizasaun Mundial Saude (OMS). Tuir planu UNICEF sei kontinua apoiu hodi rehabiltan iha area terminal nian.
Ba jornalista sira iha seremonia lansamentu fasilidade bee moos no saniamentu iha merkadu Manleuna, Diretor Diresaun Geral Agua e Saneamentu (DGAS), Gustavo da Cruz informa ba jornalista sira katak apoiu hosi Organizasaun Mundial Saude (OMS), konsege rehabilita ona haris fatin hamutuk 34 iha merkadu Taibesi no sei hetan tan apoiu hosi UNICEF hodi rehabilita haris fatin iha parte terminal nian.
Ho nune’e DGAS Husu ba jestor merkadu sira atu tau matan, hodi ninia fungsionamentu bele kontinua lao diak.
Gustavo da Cruz dehan bainhira estabelese tiha, depois laiha kontrolu ba bee no sabaun sira, diresaun jeral iha koopersaun di’ak ho sosiedade sivil, hodi halo monitorizasaun.
DGAS husu ba publika atu utiliza didi’ak, toilet sira iha publiku, liuliu iha Cristo Rei, tasi-ibun sira. Iha kada area iha cleaner hodi hamoos nafatin toilet hirak nee.
“Toilet iha fatin publiku sira, hahu husi Cristo Rei to’o iha João Paul (Tasi-Tolu), Diresaun Geral Agua no Saneamentu mak sei provizoriamente tau matan, rehabilita ona no tau matan nafatin halo manutensaun, hodi hein Munisipiu Dili Prontu ka Administrasaun Estatal prontu ona ami entrega. Orsamentu ba rehabilitasaun fundus apoiu husi UNICEF”, informa Gustavo.
Fasilidade tanki kuaze 190 instala ona iha teritoriu tomak no sei kontinua nafatin iha fatin publiku hanesan merkadu, sentru saude no fatin terminal sira.
Tuir plau etapa tuir mai pedidu, sei hahu iha eskola, hodi instala tanki sira, maibe DGAS laiha fundu propiu hodi implementa no fundu sira sei mai hosi parseiru dezenvolvimentu sira.