Home Notisia Andrew: Pratika Ijiene no Saneamentu Ne’ebe Diak, Prevene Hosi Moras Oioin

Andrew: Pratika Ijiene no Saneamentu Ne’ebe Diak, Prevene Hosi Moras Oioin

177
0
Labarik feto pratika fase liman ho bee mos iha merkadu Manleuana. [Foto: Raimundu Seguera | 19.06.2020]

Reportazen Santina Lucia da Costa

Moras pandemia Covid-19, ne’ebe to’o ohin loron sedauk hetan nia aimoruk ka vasina, hodi kura, liu hosi Organizasaun Mundial Saude (OMS) kontinua hasai protokolu ba populasaun tomak, hodi proteje no preven-an hosi Covid-19.

Iha Timor-Leste organizasaun Nasoen Unidas UNICEF ho Uniaun Europea (UE) apoiu governu Timor-Leste, hodi kontinua kombate Covid-19 no moras sira seluk iha Timor-Leste.  UNICEF ho UE instala bee moos hodi fasilita komunidade sira iha merkadu Manleuna, hodi fase liman bebeik no hadia saneamentu iha fatin refere.

Iha loron lansamentu fatin fase liman no fasilidade saneamentu nian, Embaixador UE, Andrew Jacobs hateten asesu ba saneamentu ne’ebe la diak, sei fo moras oi-oin, malnutrisaun no morters permaturas.

Embaixador UE hatutan katak estudu ikus liu hatudu katak, iha ligasaun ne’ebe forte tebes, entre saneamentu ne’ebe la diak ho malnutrisaun ba labarik sira, ne’ebe maka importante tebes ba dezenvolvimentu kognitivu no produtividade ekonomia iha futuru.

Ohin loron pratika ijiene no saneamentu ne’ebe di’ak, sai importante liu tan relasiona ho pandemia Covid-19. Fase liman bebeik, distansiamentu sosial sai aparelu ne’ebe esensial tebes, hodi prevene transmisaun moras virus corona. Atu kontrola virus corona nia daet ka moras seluk ne’ebe similiar ne’e responsabilidade individual no mos responsabilidade baze komunidade.

Andrew Jacobs relata estabelesimentu fase liman fatin no fasilidade saneamentu iha Merkadu Manleu-Ana, hanesan mos parte husi kompanha rapidu ba ijiene ne’ebe di’ak, ne’ebe implementa husi UNICEF no UE hamutuk ho Munisipiu Dili.

“Hau hakarak enfatiza dala ida tan katak investe iha saude publiku, nutrisaun ne’ebe di’ak, saneamentu no ijiene mak sai sentru, laos ba kombate Covid-19 de’it, maibe bele promove mos kresimentu naun petroliferu ba produtu internu brutu ka KDF iha futuru, bele hadiak liu tan kapasidade humanu iha futuru no mos reduz morbilidade no mortalidade”, hateten Andrew.

Iha fatin hanesan, Reprezentanteb UNICEF iha Timor-leste, Valerie Taton, kongratula, agradese Prezidente Autoridade Munisipiu Dili, ba nia lideransa hodi hatan ba COVID-19 ho serbisu sira hotu, proteze vendedor no populasaun sira iha Dili. Apresia ho serbisu hotu mak halo ona ba konsentizasaun prevensaun dengue, husi ita boot no ekipa nia apoiu serbisu hodi deklara livre husi la soe foer arbiru.

Entretantu, Diretor Agua no Saneamentu (DGAS), Gustavo da Cruz, hateten, Kooperasaun ho parseiru sira oinsa hamutuk kombate virus Corona no mos moras saude publiku sira seluk

“Ita hamutuk oinsa atu halo prevensaun ba Corona, iha apoiu ne’ebe parseiru sira fo ba governu Timor-Leste”, hateten Gustavo da Cruz.

Gustavo dehan apoiu ida ne’e laos apoiu ikus nian, maibe UNICEF sei apoiu nafatin. Apoiu barak ne’ebe halo ona ita boot sira akompanha katak, iha teritoriu laran tomak, instalasaun tanqui sira ne’e no nia besi solda sira, hetan apoiu husi UNICEF, UNDP, Embaixada Australia, ho mos ONG internasional seluk.

“Merkadu Manleu ohin ne’e ita mai identifika estragus saida mak iha no depois kompanhia ida sei hamoos, depois sira sei survei no rehabilita hariis fatin sira ne’e. Husu kontribuisaun husi vendedores sira, ita nia kompradores sira merkadu ida ne’e bele tau matan kuandu ita hadia ona fasilidade sira ne’e. Husu ita hotu-hotu koopera, ami nia diresaun agua saneamentu prontu nafatin atu kontribui. Dehan, Gustavo.

UNICEF hetan apoiu orsamentu hosi Uniaun Europea hamutuk $500 mill, hodi instala fasilidade fase liman no hadia saneamentu iha fatin publiku sira hanesan merkadu.

LEAVE A REPLY

Please enter your comment!
Please enter your name here