Home Notisia RENETIL Tinan 32, SekJen Russuo: Tenke Kontinua Liberta Povu Hosi Kiak...

RENETIL Tinan 32, SekJen Russuo: Tenke Kontinua Liberta Povu Hosi Kiak no Mukit

609
0
Sekretariu Jeral RENETIL, Juaquim Fonseca "Russou". [Foto: Santina Lucia da Costa | 19.06.2020]

Reportazen Santina Lucia da Costa

Loron 20 de Juñu 2020 Resistência Nacional dos Estudantes de Timor-Leste (RENETIL) komemora loron moris ba 32. RENETIL ne’ebe harii iha loron Iha Bali Indonesia, iha tinan 1988, ho mehi ida iha tempu ne’eba, estudante Timoroan sira, ne’ebe kontinua sira nia estudu iha Indonesia, hodi luta ba ukun rasik ho an ho prinsipiu “Antes Sem Titulo Do Que Sem Pátria”,

Neon Metin dadalia ho Sekretariu Jeral RENETIL, Juaquim Fonseca “Russuo” hodi hanoin hikas fali memoria maluk estudante sira, ne’ebe haknaar an iha RENETIL, hodi hakilar maske iha ameasa nia laran, maibe la hamate sira nia espiritu.

Russu hateten RENETIL haree libertasaun ne’e hanesan prosesu ida ne’ebe envolve iha faze rua mak hanesa  Liberta Patria no Liberta Povu.

“RENETIL haree libertasaun hanesan prosesu ida ne’ebe envolve faze rua mak hanesan hanesan libertasaun patria, misaun ida ne’ebe atinjidu ona, bainhira Timor-Leste fizikamente livre ona husi okupasaun forsa estranjeira nian. Pratikamente ita hateten tinan 1999, misaun ida ne’e ita atinji tiha ona, maibe ita haree hanesan rekezitus balun ba intergridade fizika estadu Timor-Leste nian ne’e, balun seidauk kompletu iha altura ne’eba, hanesan fronteira maritima, buat sira ne’e seidauk iha”, hateten Sekretariu Jeral RENETIL, Joaquim Fonseca “Russuo” ba Neon Metin iha nia rezidensia Metiaut loron, 19/6.

RENETIL nia luta ida mak konaba libertasaun povu, ba Neon Metin Russou hateten, libertasaun povu ne’ebe RENETIL hakarak mai liberta povu hosi kiak no mukit, hosi moras, hosi presaun oioin, laos deit fiziku maibe presaun hosi edukasaun

“Prosesu ida ne’ebe mak naruk, misaun ida ba libertasaun povu to’o agora hanesan prosesu kontinuasaun ida, prosesu ida ne’ebe lao nafatin, mezmu ita nia rain ne’e livre ona husi okupasaun forsa rai liur nian”, hateten Russou.

RENETIL nia misaun atu prepara profisionais sira, konsiensia revolusionaria atu partisipa iha prosesu rekonstrusaun nasional, desde iha ne’eba kedas, militantes Timoroan sira ne’ebe sai hanesan militantes RENETIL, sira hotu buka atu prepara sira nia-an, husi aspetu akademiku, tekniku, hodi partisipa iha prosesu rekonstrusaun, ne’ebe agora dadaun lao iha prosesu dezenvolvimentu nia laran.

“RENETIL komemora nia tinan ba 32 nian, ita halo reflesaun, hodi hanoin hikas fali, ita to’o iha ne’ebe ona, iha prosesu atu hakonu libertasaun ne’e. Independensia to’o iha ne’ebe ona, entaun ida ne’e mak RENETIL husu nia-an. Hare fila fali kondisaun povu sira nian ohin loron, oinsa ho aspetu saude, edukasaun, Liberdade jeral, Liberdade politika no kondisaun enkuadramentu juridika”, hateten Sekjen RENETIL

Sekjen RENETIL hateten presija halo avaliasaun ba idak-idak nia-an rasik, saida mak halo ona no oinsa idak-idak kontribui hodi muda kondisaun sira ne’e.

RENETIL harii iha loron 20 fulan Junhu tinan 1988, harii hosi estudante na’in 10 nebe estuda iha Denpasar, Bali.  Estudante na’in 10 nebe hanesan fundador RENETIL nian mak Fernando de Araújo (La’ Sama), José A.M.X. Gonçalves (Si’ak), Lucas da Costa (Lahe Mau/Rama Metan), Carlos da Silva Lopes (Freezip/Radihka Saky), Agapito Cardoso (Mau Loco), Marciano Octávio Garcia da Silva (Chury Sakar Subar), Julio Abel Ribeiro) (Tae Tudak), João de Araújo (Mau Terus), Adolfo Fontes Soares (Mau Lamas) no João Cardoso Fernandes (Mau Riba).

Print Friendly, PDF & Email

LEAVE A REPLY

Please enter your comment!
Please enter your name here