Reportajen Silvino Freitas
Komunidade suku Bibileo Viqueque preokupa tebes ho problema infraestruturabázika sira hanesan bee moos, ne’ebé konsumu ba nesesidade lor-loron nian, no uza ba halo natar inklui mós fasilita iha postu saúde.
Reprezentante Xefe Suku Bibileo Angelo Segurado hateten komunidade suku Bibileo ne’ebé hela iha area Krarás no Uatukila konsumu de’it bee mota, bainhira tempu udan kuandu mota tuun komunidade sira konsumu de’it udan-been labele asesu ba mota tanba bee merak.
“Suku Bibileo iha bee matan ka bee moris iha area Welaluhu maibé komunidade labele asesu, tanba distánsia ne’ebé do’ok husi komunidade nia hela fatin” dehan Angelo Xefi Aldeia Balidi-oan ne’ebé reprezenta Xefi Suku Bibileo, iha salaun City 8 Dili, (22/03).
Nia dehan, suku Bibileo nia komunidade hela iha fatin 3 maka Uatukila, Kraras no Lalerek-mutin nune’e komunidade sira hela iha lalerek-mutin asesu de’it ba bee posu, maibé iha tempu bailoron bee sira ne’e maran hotu no iha balun de’it maka asesu.
“Iha setor agrikultura nian ami Krarás no Uatukila iha natar ne’ebé luan tebes maibé ami labele asesu ho di’ak, tanba irigasaun ne’ebé ladi’ak nune’e natar hirak ne’e labele asesu ba bee ho di’ak” nia dehan.
Entretantu kona-ba saúde nia dehan, suku Bibileo iha mós postu saúde maibé labele asesu ba bee moos, tanba distánsia husi postu saúde ne’e dook husi bee posu, no iha postu saúde ne’e mós presiza pesoál saúde permanente balun.
Suku Bibileo iha aldeia 8 hanesan hare-oan, Fatuhosa, Webae, Maneklaran, Haisae, Amarleze, Lakuwai no Balidi-oan ho totál populasaun 3,800 no xefe família 619.
