Reportazen Bernarda da Costa
Lixu sai inimigu ema ho animal, lixu sei fo risku ba ema ho animal nia moris no sei fo beneno ba ambiente.
Relasiona ho lixu ne’ebe sei kontinua soe namkari iha tasi ibun no fatin sira seluk, Pixelasia serbisu hamutuk ho Embaixada Nova Zelandia, Movimentu Tasi Moos no Cinema Lorosa’e halao atividade limpeza jeral iha tasi ibun Bidau Lecidere, iha Sabadu, 18/07.
Koordenador Movimentu Tasi Moos Recibere Mota hateten ohin loron hamutuk iha ne’e hodi hamoos tasi, tanba foer hirak ne’e sei fo impaktu boot ba iha biodiversidade sira.
“Ita hotu hatene katak impaktu lixu ba ita nia ambiente nee la diak no la fo saudavel mos ba ita nia animal sira iha tasi laran”, hateten Recibere
Pixelasia mos organiza nia grupu voluntariu, ne’ebe eziste ona tinan 5, hodi kontinua halao atividade hamoos lixu, hodi kontinua luta kontra lixu. Hanesan mos ho Grupu Movimentu Tasi Moos, sei kontinua nafatin halo atividade ida ne’e no halo mos iha muisipiu sira.
“Ami mos sempre fo formasaun no fahe esperensia ba estudante sira iha Dili no membru F-FDTL sira iha Maliana, Same no Liquisa konaba lixu, hodi proteze rikusoin sira”, dehan Koordenador Movimentu Tasi Moos ba jornalista sira.
Koordenador Movimentu Tasi moos ne’e agredese no orgullu tebes ba Embaixada Nova Zelandia no mos apresia ba aktividade ohin loron, tamba luta kontra lixu iha ita nia tasi ibun area Dili nian.
Iha fatin hanesan estudante Aurelia da Costa Madeira sente kontente tebes ho atividade ohin loron, tanba kontribui ba sidade nia moos.
“Ita presiza moris iha ambiente moos hodi sente sidade nia furak.Wainhira ita soe foer arbiru sei fo impaktu ba ita nia saude no mos ba ambiente rasik”, dehan Aurelia.
Se los mak iha responsabilidade hodi proteje ihla furak ne’e?, se laos ita, seidauk tarde atu salva ilha murak ne’e hosi lixu sira ne’ebe fo beneno ba ema no animal nia moris. Bainhira kontra lixu, signifika ita hatudu ita nia an no Timor.