Reportazen Francisco JDA
Ministeriu Saúde (MS) pilar 2 hamutuk ho Administrasaun Municipiu Dili no Polísia Nasionál Timor Leste (PNTL) hala’o sosializasaun ba Loja sira iha Audian, Kuluhun, Colmera no Becora hodi alerta ba vendedor no komprador sira, atu kontinua mantein distansiamentu sosial uza maskra no tau bee no sabaun iha loja ba prevensaun COVID-19 iha Timor-Leste
Diretora serbisu Saúde Municipiu Dili, Agostinha Segurado ba jornalista sira hateten, sensibilizasaun ne’e hala’o liu-liu ba fatin públiku sira, tanba kriteria saúde mundiál nian ne’ebe hateten ema hotu tenki uza maskara no distansiamentu sosial no fase liman beibeik ho sabaun.
“Ohin ne’e konsentra liu ba loja sira tanba movimentasaun sira ne’e makaas tebes, entaun oinsá hare liu ba material sira ne’ebé prevene, hanesan prepara bee iha loja oin ba ema vizitante ka ema faan sasán tenki uza maskara no presiza halo distansimentu”, hateten Diretora Agostinha, iha Colmera 07/01.
Nia afirma katak maske kazu COVID-19 ne’ebe afeta numeru kiik, maibe ne’e laos kestaun tanba ema hotu presiza prevene-an ba moras oin-oin hanesan diaria no moras sira seluk. Entaun tuir Ministeriu Saude importante tebes atu prevene-an hosi moras sira seluk no COVID-19, atu nune’e bele reduz numeru virus Corona.
“Di’ak liu prevene-an hosi COVID-19 duké akontese ba transmisaun lokál, tanba kazu dadaun ne’e importadu tanba ne’e mak prevene-an antes no sensibilizasau ne’e bazeia ba dekretu lei estadu emergencia nu.73/2020”, hateten Diretora Agustinha.
Nia dehan Saúde Municipiu Dili, nia asaun halo lor-loron ba sensibilizasaun tama sai loza no aldeia maibé ema balun susar tebes atu koñvense, tanba ne’e inisiativa hosi Presidente Autoridade no Komando PNTL Municipiu Dili no Ministeriu Saude suporta nune’e senbiliza di’ak liu tan
“Primeiru mak ita eduka no ajuda se mak la iha maskra, MS prepara maskra oituan prepara ba ema ne’e, husu sira atu kontinua uja maskra, se la uja komando PNTL hare sei kaptura no loja sira ne’ebé la tau bee, ami obriga tenki tau bee, se la tau bee entrega ba komando mak sei fo sansaun”, hateten Diretora Agostinha Segurado.
Tuir Neon Metin nia observasaun iha terenu bainhira akompanha ekipa pilar 2, PNTL konsege taka loza Xina ho naran Logo iha Kuluhun de baixo tanba la prepara bee no sabaun iha loza oin.