Reportazen Santina Lucia da Costa
Xefe Estadu Maiór Jenerál Falintil-Forsa Defeza Timor-Leste (F-FDTL), Majór Jenerál Lere Anan Timur informa ba Prezidente Republika, Dr. Francisco Guterres Lu-Olo kona-ba rekrutamentu Falintil-Forsa Defeza Timor-Leste (F-FDTL) iha fulan Marsu ka Abril.
“Maibé hau reuniaun ho hau nia lojistika Xefe Estadu Maiór katak kondisaun laiha, liu-liu fardamentu, kilat, no kilat musan laiha. Uma ne’e problema laiha, iha 10 resin ne’e bele uza. Entaun hau hanoin katak politiku sira, Governu kria lalais meius liuliu fardamentu, kondisoens ne’ebé ami haruka ba ona”, hateten Xefe Estadu Maiór Jenerál FALINTIL- Forsas Defeza Timor-Leste (F-FDTL), Lere Anan Timur ba jornalista sira iha Palasiu Prezidensial, Nicolau-Lobatu, Bairo-Pite 20/01.
Major Lere Anan Timur informa ba Prezidente Republika, Dr. Francisco Guterres Lu-Olo konaba fardamentu ba militari sira, no kompania Sirteks ne’ebe tinan-tinan fo fardamentu no kompania Haksolok ne’ebe mak sei tuir tender.
Nia afirma prioridade ba rekrutamentu hamutuk 1200 iha tinan ida ne’e 2021, 600 primeiru tornu, 600 segundu tornu, maibe Lere Anan Timu dehan tuir informasaun orsamentu mak laiha.
“Agora orsamentu laiha ne’e, laos problema hau nian, hau nia hakarak rekruta ema 1200 ne’e atu atinji lalais numeru autorizadu, se lae ita mak hela de’it ho forsa katuas sira ne’e, ami katuas veteranus mai husi ai-laran kuaze besik 100 sei ativu hela, ne’e ninia aguenta mak tinan ida ne’e de’it ona”, dehan Lere.