Reportazen David da Costa Gusmao
Konfrontasaun entre grupu ho juventude ne’ebe mak akontese iha Loron 28/01 kalan iha aldeia Ailoro, suku Foho-Ailiku, sub-distritu Hatudo Munisipiu Ainaro, hodi rezulta ema nain 1 kanek iha liman no ulun.
Liu husi konferensia imprensa Portavos PNTL Superintendente Xefe, Arnaldo De Araujo informa ba jornalista katak iha konfrontu entre grupu ho juventude, ne’ebe akontese iha aldeia Ailoro iha loron 28/01 kalan no rezluta joven ida hetan sofre iha liman no ulun.
“Bazeia ba rezultadu ne’ebe hala’o investigasaun iha terrenu katak suspeitu inisial DDS (23) mak organiza grupu balun, hodi asalta vitima ho insial LZM (19), tanba iha problema privadu”, dehan Portavos PNTL ba jornalista sira iha edifisiu Kuartel Jeral kaikoli, 29/01.
Nia salienta tan iha akontesementu ne’e, PNTL Ainato to’o kedas iha fatin, hodi hakalama situasaun no kaer kedas supeitu hodi detein ba iha eskuadra Hatudo.
Entertantu vitima oras ne’e dadaun hala’o hela tratamentu saude iha ospital Ainaro, tanba sofre kanek iha parte liman no ulun no parte PNTL Ainaro kontinua halo investigasaun ba suspeitu sira ne’ebe mak envolvi iha konfrontasaun refere.