Lei nu. 14/2020 sobre Orsamentu Jeral Estadu (OJE) 2021 iha artigu 7.1 regula katak Governu Timor-Leste hetan autorizasaun atu foti osan máximu $1.377,6 milloins husi Fundu Petrolíferu durante tinan-2021. Entretantu artigu 7.3 husi Lei hanesan estipula katak governu bele foti osan husi Fundu Petrolífera wainhira saldu iha konta Tezoru menus husi $200 milloins.
Relasiona ho Orsamentu Jerál Estadu (OJE) 2021 ne’ebé to’o agora governu seidauk iha nesesidade halo levantamentu, ba jornalista sira Ministru Finansas, Dr. Rui Gomes esplika katak dadaun ne’e governu hetan hela osan hosi reseita domestika, ne’ebé kada fulan osan ne’e bele hetan $12 milloens to’o $15 Milloens, no osan ne’ebé ezekuta ona hamutuk 12% signifika $190 milloens mak dadaun ne’e sirkula hela.
Ministru Finansas, Dr.Rui Gomes hateten duke foti osan fundu petroliferu (minarai) no rai iha tezouru para funan la iha di’ak liu rai iha li’ur.
“Kada tinan ita halo levantamentu ne’e, nunka halo iha primeiru trimestre sempre halo ne’e iha Maiu no Junhu, tanba ita nia osan iha kaixa ne’e sei iha no kada tinan Ministeriu Financas kolekta hela impostu sira ne’ebe tama, duke foti ita nia osan hosi fundu minarai, para depois rai de’it iha tejouru no funan la iha, entaun husik osan ne’e iha li’ur no ami monitoring kada loron”, hatete Ministro Dr. Rui Gomes iha salaun MF Aitarak laran, 19/02
Dr.Rui Gomes reforsa tan, ezekusaun osan ne’e 12% ona, no osan ne’ebé sirkula hela iha Timor-Leste dadaun ne’e hamutuk $190 milloens no iha ita nia kaixa iha $230 milloens, ne’e osan ne’ebé la iha nesesidade atu foti tan.
“Ita labele selu projetu sira ne’ebé seidauk hahu no seidauk halo, entaun projecto sira ne’e seidauk tama mai no seidauk halo kompletu ita atu selu, bazeia ba saida”, hatete Minstro Dr.Rui Gomes
Ministro hatutan reseita domestika ne’ebé kada fulan governu hetan mak $12 milloens to’o $15 milloens entaun osan ne’e iha hela, nune’e la iha nesesidade atu foti osan tanba dadaun osan iha hela.
Lei nu. 14/2020 sobre Orsamentu Jeral Estadu (OJE) 2021 iha artigu 7.1 regula katak Governu Timor-Leste hetan autorizasaun atu foti osan máximu $1.377,6 milloins husi Fundu Petrolíferu durante tinan-2021. Entretantu artigu 7.3 husi Lei hanesan estipula katak governu bele foti osan husi Fundu Petrolífera wainhira saldu iha konta Tezoru menus husi $200 milloins.
Antes ne’e Ministru Presidencia de Konsellu Ministrus Fidelis Magalhaes esplika katak tamba osan iha konta tezoru sei suficiente, governu deside atu la foti lai osan husi Fundu Petrolíferu, nune’e bele hetan funan boot tamba wainhira montante husi osan ne’ebé rai iha banku boot, mak funan sei boot enkuantu osan ne’ebé rai mak kiik, funan sei kiik mós.