Reportazen David da Costa Gusmao
Ministeriu Saude rejista tan transmisaun komunidade (lokal) foun nain rua, liu hosi konferensia imprensa Koordenador Forsa-Tarefa ba Prevensaun no Mitigasaun Surtu COVID-19 iha Timor-Leste, Dr. Rui Maria de Araujo informa ba jornalista katak ohin Ministeiru Saude (MS) rejista Kazu konfirmadu foun 2, nafatin husi aldeia Klauhalek, Suku Belulik Leten, Postu Administrativu Fatumean, Munisipiu Covalima.
“Sira nain 2 membru familia husi kazu foun ne’ebe anunsia tihaona horiseik. Ekipa ambulansia ohin meiu-dia to’o iha Fatumea no evakua pasiente konfirmadu COVID-19 foun hamutuk nain 6, mai sala izolamentu iha Vera Cruz”, dehan Dr. Rui iha Centro Integradu Jesraun Krize (CIJK) iha CCD, 24/02.
Nia Esplika hosi sira nain 6, balun asintomatiku, balun iha sintoma infesaun respiratoriu agudu, maibe sira hotu iha kondisaun estavel no orsida kalan sira to’o iha Vera Cruz.
Nia in forma ekipa vijilansia epidemiolojika ho ekipa laboratoriu, ohin hamutuk ho ekipa Centro Saude Fatumea nafatin foti amostra husi ema ne’ebe iha kontaktu besik ho sira ne’ebe konfirmadu pozitivu ona no mos husi viziñu sira.
Nia haktuir Kazu sira konfirmadu foun husi horseik to’o ohin iha Fatumea, nafatin hatudu katak iha ona transmisaun lokal husi possivelmente kazu “importadu klandestinamente” husi populasaun ne’ebe tama sai fronteira, maibe sei restritu iha cluster ka agrupamentu ida iha suku Belulik leten.