Reportazen Zevonia Vieira
Ministeriu Saude (MS) deteta tan kazu konfirmadu foun COVID-19 iha lroon 21 Abril hamutuk 57. Liu hosi komunikadu imprensa, Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr.Rui Maria de Araújo relata ba jornalista sira katak total kazu foun pozitivu COVID-19 ba loron 21 Abril hamutuk 57 (iha Dili 53, Baucau 3 no Bobonaro nain 1).
Total konfirmadu kumulativu hosi 21 Marsu 2020 to’o ohin loron total 1509, husi total kazu detetadu foun ohin mane 34, feto 23. Husi total kazu detetadu foun ohin asintomátiku 52 (91,2%), sintomátiku 5. Husi total kazu detetadu foun ohin, 50 (87,7%) maka deteta tamba halo teste ho razaun atu halo viajen/ka halo ona viajen ba Munispiu hafoin deteta pozitivu. Maski nune’e, sira ne’ebé rezultadu teste pozitivu, maioria sira nia hela fatin, iha duni cluster sira ne’ebé iha kazu detetadu barak.
Kazu rekuperadu ne’ebé ralata ohin hamutuk 33, total kazu ativu 749. Husi horseik mai ohin hamutuk 832 halo teste PCR ho detalles hanesan vijilánsia sentinela 42. Rastreiu ba kontaktu (Contact tracing) nain 32. Rastreiu Aleatoriu (Random Screening) nain 336, viajen sai husi serka sanitária Munisipiu Dili nain 397 no viajen internasionál nain 25.