Reportazen Joselina dos Santos
Estudante Eskola Ensino Basico 3 Ciclo (EBC), Laisorolai Sala Paralela Da’e-Mena Suku Abo, Protu-Admintrativu Quelicai, Munisipiu Baucau prontu tuir ezame primeiru periodu Ano letivu 2021.
Liu hosi entrevista ho Neon Metin, estudante Jenilton via telefone hateten pronto atu tuir ezame, maibe sekarik pontus de ezame ne’e foti husi desimu ano, desimu primeiru ano ne’e karik sei bele prienxe no sei halo buat ruma, maibe sekarik professores sira fo pontus de ezame ne’e dezimu segundu ano nian, entaun ami labele, tanba ami tuir aula la to’o fulan ida ho balun, tama kedas Serka Sanitaria.
Jenilton konfesa katak Serka Sanitaria ne’e difikulta tebes sira nia estudu, tanba to’o agora sira la hetan materia ruma husi professores sira, maibe karik professores sira prepara rezumu materia ba estudante, sira prontu atu tuir ezame.
“Ha’u la husu buat ida, maibe ha’u husu professores sira fo materia ba ami, para estuda atu nune’e ezame karik ami hetan valor di’ak, tanba ne’e husu ba kolega sira prepara aan estuda,” nia haktuir.
Neon Metin mos halo entrevista ho Profesor Jaime Jeronimu, nia haktuir ba Neon Metin katak Serka Sanitaria (SS), ne’ebe hahu hosi loron 9 Marsu 2021, fo impaktu ba prosesu aprendizajen, no hetan orientasaun hosi Koordenador Eskola katak iha tempu serka sanitaria, prepara rezumu materia no pontus ezame ba premeiru period nian ba estudante sira.
“Mais to’o agora serka sanitaria ka estadu emerjensia seidauk bele remata, entaun ami nia prosesu aprendizajen seidauk la’o, no rezumu materia hirak ne’e seidauk bele fo ba estudante sira no ezame primeiru periodu nian seidauk bele realiza, tanba sei hein desizaun ka informasaun husi superior sira bainhira Serka Sanitaria remata mak foin bele realiza ezame ba primeiru periodu nian,” dehan Professores Jaime.
Kona-ba valor estudante ne’e sei uza maneira barak, tanba antes serka sanitaria ne’e Profesores sira hanorin ona materia balun, maibe oituan entaun iha serka sanitaria sira labele fo valor mean ba estudante sira, tanba situasaun mak hanesan ne’e.
Direitor Eskola Ensino Basico 3 Ciclo (EBC) Laisorolai, Paralela Da’e-Mena, Venancio Cabral hateten katak defende ba orientasaun, tanba pontus ezame no rezumu materia prepara ona hein orientasaun, karik orientasaun tun sira prontu fo ezame ba estudante sira, tanba serka sanitaria ne’e prevensaun ba atividade prosesu aprendizajen nian indeterminadu.
“Molok seidauk tama ba estadu emerjensia, ami prepara ona ezame diariu ne’ebe professores sira fo ne’e iha ona valor, bainhira valor ezame diariu nia iha ona, depois kuandu ezame primeiru periodu ne’e mak sira monu, entaun aumenta valor ezame diariu ninian atu nune’e prienxe sira nia valor ba kaderneta,” dehan Venancio
Nia informa katak iha tempu serka sanitaria ne’e husu ba estudante sira hotu hatene katak iha area rural ne’e balun iha televizaun no balun la iha telefone no balun laiha, tanba ne’e nu’udar direitor husu ba estudante sira katak materia sira ne’ebe professores sira fo ne’e, estuda iha uma no traballu hirak ne’ebe professores sira fo estuda para nune’e bele kompleta imi nia valor.
Total estudante hamutuk 270, mak prepara-an ba ezame primeiru periodu ano letivu 2021 nian.