Reportazen Adroaldo ‘Saretukau’
Asosiasaun Futebol Manatuto (AFM) halo abertura ba Programa Asosiasaun nian ‘Grass Root ka Centru Juvenil ba Futebol’ atu prepara jogador ho idade 8 to’o 15 Postu Laclubar iha futuru ba nível Municipal no Nasional ne’ebé hala’o iha edifísiu Administrasaun Postu Administrativu Laclubar Sesta ne’e.
Iha abertura Prezidente AFM, Mario da Conceição Soares hateten Program Grass Roots ne’e atu prepara jogador juvenil Laclubar nian ba iha nível munisipal no nasional.
“Ami nia objetivu ne’e atu mai estabelese Grass Roots ka Sentru Juvenil ba Futebol iha Postu Laclubar tanba ita hanoin ho Grass Roots ne’e mak ita prepara jogador sira ba future aban bai-rua, ida ne’e hanesan eskola ba bola nian. Ne’e mak ita halibur ita nia oan sira hosi ida 8 to’o 15, feto no mane, sira partisipa iha treinu ne’e, para bele sira sai jogador ba aban bai-rua nian, tantu ba Postu Laclubar, Manatuto no ba Timor”, hateten Prezidente AFM, Mario iha edifísiu Administrasaun Postu Laclubar, Sesta, 14/05.
Nia hatutan ho idade ne’ebé determina ona, wainhira sira hetan treinu ne’ebé di’ak no atinji idade 18 ka 19, sira bele kompete ona iha nível Municípiu no nasional. Nia dehan liu hosi idade ki’ik, iha tinan 10 mai sira bele sai jogador di’ak “atu reprenzenta Postu Laclubar, Manatuto, bele kompete iha nível nasional nomos bele ba iha internasioal, se sira iha telentu futebol ne’eb´di’ak”.
Iha fatin hanesan Administrador Postu Administrativu Laclubar, Natalino Martins de Carvalho apresia tebes ho program ida ne’e, tanba liu hosi programa Grass Roots ne’e bele dezenvolve di’ak liu jogador Laclubar oan sira, atu nune’e labele sai adeptus de’it.
“Refere ba alin sira labele sai penonton maibé husik ema seluk atu akompaña ita boot sira. Ohin mos ami nia alin sira, ita boot sira bele sura mos, ida ne’e parte pozitivu ida ba ami Postu Adminsitrativu Laclubar”, dehan Administrador Natalino
Nia hateten durante prosesu naruk liu-liu iha desportu ni-nian, jogador Laclubar oan barak mak iha talentu di’ak ne’ebé bele reprezenta Munisípiu Manatuto ba nasional ka fatin seluk, maibé tanba kestaun balu nune’e jogador sira la dezenvolve ba oin.
Administrador ne’e mos haforsa tan katak, nia ho nia lideransa suku sira prontu tebes atu kolabora, hodi ajuda programa desportu ida ne’ebé di’ak ba futuru Manatuto.
“Ami hakarak atu koopera atu nune’e bele ajuda programa ida ne’e. Atu dehan katak futuru Manatuto iha ita hotu nia liman, talves hosi programa seluk maibé parte desportu nian ami na’in hirak sei hamutuk ho ita boot sira, atu nune’e bele lori desportu Manatuto nian, halo kompetisaun iha ne’ebé de’it”, Administraor Natalino hateten.
AFM nia vizaun maka hakarak forma jogador Postu neen, Laclubar, Soibada, Barique/Natarbora, Laleia, Laclo no Manatuto Vila hosi Munisípiu Manatuto nian ba médiu ho longu prazu nian. Misaun AFM nia mak estabelese Grass Roots hodi atinjin vizaun atu hetan jogador di’ak iha future aban bai-rua nian.