Reportazen Zevonia Vieira
Governu Australia apoiu governu Timor-Leste liu hosi Sekretariu Estadu Protesaun Sivil (SPES) hodi entrega lona ba komunidade afetadu hosi inundusaun ne’ebe akontese iha loron 4 Abril, liu-liu komunidade iha Maslidun ne’ebe afet makaas.
Liu hosi seremonia entrega ofisial Koordenadora Centro Evakuasaun Maslidun, Bernardete Salsinha hateten durante inundusaun akontese, situasaun komunidade to’o agora hasoru dezafius barak, liu-liu konaba hela fatin, tanba komunidade barak liu-liu feto ho labarik hasoru sofrementu boot liu.
“Hahan no sasan sira ne’ebe governu no organizasaun sosiadade sivil sira fo ona antes, sei la to’o nafatin to’o ohin loron, nune’e horseik ekipa hosi SEPS horseik mai foti ona dadus konaba komunidade ne’ebe presiza lona hodi satan netik sira nia moris”, dehan Bernadete iha Maslidun, 15/05.
Nia dehan lona ne’ebe sei fahe sei la to’o ba komunidade sira, nune’e sira ne’ebe sedauk hetan sei hato’o fali ba governu, nune’e sira bele hetan, “se karik balun la hetan sei hamosu diskriminasaun, atu dehan katak iha povu, mak iha estadu”.
Iha fatin hanesan First Secretary, Human Development Australian Embassy, Troy Skaleskog hateten governu Australia kontente apoiu governu Timor hodi responde emerjensia ba dezastre ne’ebe akontese.
“Apoiu ne’ebe fo espera bele sustenta temporariamente ba maluk afetadu sira no mos bele hatutan liman ain serbisu jestaun dezastre nian”, dehan Troy iha Maslidun.
Nia hatutan durante ne’e hosi Australia nia programa Dezastre Ready ka Prontu Dezastre agensia konsorsiu hanesan Care, Oxfam, World Vision, Caritas, Plan Internasional no Ra’es Hadomi Timor Oan (RHTO) no serbisu hamutuk ho Protesaun Sivil hodi tau matan iha dezastre iha Timor laran tomak.
Ba Neon Metin Sekretariu Estadu Protesaun Sivil, Eng. Joaquim Jose Gusmao dos Reis Martins esplika katak objetivu hosi fahe lona iha Masilidun tanba komundidade barak mak sedauk fila ba uma tanba sira nia uma hetan estragus, nune’e sira hari lona temporaria.
“Ita hetan apoiu lona hosi governu Australia hamutuk 220 hodi ajuda refugiadu sira ho kualidade lona ne’ebe diak. Tanba ne’e depois halo obeservasaun iha ne’e, tuir sira nia Relatoriu komunidade presiza lona mais menus 47 ba kada uma kain”, dehan Sekretariu Estadu Joaquim.
Nia hatutan sekarik iha lona restu, sei identifika tan komunidade afetadu sira ne’ebe presiza lona temporario hodi sira hela ba.
Lona temporario ne’ebe oferese ba komunidade iha Masilidun hamutuk 47, kulusaun 47 no solar panel hamtuk 94 ba.
