Home Memoria Padre Maciel Degollado, Halo Abuzu Sexual ba Labarik Mane 60, Iha Fen...

Padre Maciel Degollado, Halo Abuzu Sexual ba Labarik Mane 60, Iha Fen 2 no Oan 6 (1920 – 2008)

1926
0
Padre Marcial Maicel Degollado (foto: dw.com)

Padre Marcial Maciel Degollado moris iha sidade kik ida naran Michoacan, Mexico, nia mak fundador ba ordo Legionaries of Crist (Legião de Cristo). Legião ida ne’e harii hodi eduka ema sira mak hakarak sai padre no madre. Padre Maicel iha tiu nain 2 mak nudar mos Bispo iha Mexico. Nia koinesidu nudar ema ida suave, amigavel, devosional, no iha sabedoria. Iha nia tempu serve nudar padre, labarik nain 60, bele mos liu ida ne’e, mak sai nudar vitima ba nia hahalok abuzu sexual. Vitima barak mak labarik mane idade 11 – 16.

Nia establese movimentu ka ordo Legião de Cristo  iha 1941 no hetan osan barak hosi industrialista sira iha Mexico. Nia mos konsege halibur osan hosi viuva eis-Presidente Venezuela nian. Nia hetan apoio osan hosi Grupo Bimbo ho bisnis halo paun, no mos hosi Carlos Slim, hosi Giant Motor. Ema nain rua ne’e mak rikasu bot iha Mexico no iha mundo. Valor osan mak hetan ikus liu iha nia konta bankaria mak 650 milaun dolar amerika iha tinan 2004.

To’o tinan 56 nia desidi hola feto. Feto ida ne’ebe nia hola ho idade 19, naran Blanca Gonzales. Hosi feto ida ne’e sira hetan oan mane nain rua. Oan mane nain rua ne’e ikus sai vitima abuzu sexual. Blanca hatete ba programa radio ida iha Mexico katak bainhira nia hasoru Maciel, nia bosok Blanca katak nia Exekutivu ida ba kompania mina nian, intelijen privadu no agen CIA nian.

Feto ida mak ida mak sai nudar membru ba ordo ne’e iha pasadu hatete katak sira iha admirasaun bot ba padre Maciel.

“Nia hanesan Maromak kik oan ida ba ami. Imi haree oinsa ema koalia ho Papa no sira atu tanis no desmaya? Nune’e mos ami bainhira koalia ho padre Maciel,” feto ida ne’ebe mak hela iha konventu Legião ne’e iha nia tempu klosan hatete.

“Se hau hela nafatin iha ne’eba hau sei sente hanesan enganadu – dedika hau nia an halo tuir regras sira mak instituisaun ne’e rasik la respeitu,” feto ne’e hatete ba Reuters no lakoi atu fo sai nia naran tauk ofende nia kolega sira mak sei hola parte ba kongregasaun ne’e.

Tinan 1970, iha tiha ona keisa hasoru padre Maciel tan halo abuzu sexual hasoru Kongregasaun seluk nia membru, inklui ba labarik. Keisa ida ne’e mai hosi padre, profesor, konseleiru, no engeneiru sira. Sira ne’ebe halo keisa mak ema hosi Espana no Mexico, grupo ne’e hanaran sira nia an ‘Kolejiais Apostoliku’. Sira dehan katak abuzu sexual ne’e akontese dekada tolu nia laran. Iha tinan 1990 nia laran, Micel iha idade 70 ona no iha tinan ida ne’e mak vitima sira hahu halo akuzasaun hasoru nian dala ida tan. Tinan 1997, vitima nain 9, mesak nia estudante seminarista iha Mexico, hakat ba publik hodi koalia sai hahalok at Micel nian. Sira nain 9 ne’e mesak akademista bot no eis padre sira. Grupo katolik Mexico nian hatete katak padre Maciel halo abuzu sexual ba labarik nain 60. To’o tiha tinan 2004 mak ema sira ne’ebe hatama keisa hetan informasaun katak Kongregasaun Dutrina ba Fiar nian loke fali kazu hodi halo investigasaun ba padre Maciel.

To’o 2005 mos seidauk iha lejionariu ida mak diskonfia buat ida kona padre Maciel. La iha ema ida mak iha korajen atu expresa dubidas pesoal kona ba padre ne’e. Tan nudar lejionariu sira iha dever atu la kritika atividades mak sira nia leader halo. Sira hetan tiha ona edukasaun kona ba oinsa kuidadu segredu hanesan ne’e. Bainhira sei kiik, saida deit mak sira haree ka rona, la iha ema ida mak sente iha autoridade atu kritika atividade padre Maciel nian. Tuir norma ne’ebe padre Maciel rasik establese, lejionariu ida bainhira hakarak hato’o keisa bele hato’o ba sira nia director jeral ka director territorial ka superior imediata. Ne’e signifika, se lejionariu ida kesar hahalok at ruma hosi nia superior, keisa ne’e to’o deit iha superior ne’e no la kontinua tan. Se iha ema ida deit mak hatene kona ba Maciel nia moris privadu entaun sei hela deit to’o iha ema ne’e, lejionariu 20 seluk kontinua halao servisu hanesan babain.

Kardinal Ratzinger, nudar nai ulun ba Kongregasaun Dutrina ba Fiar nian iha momentu neba (Joao Paulo II nia tempu) hatene katak Maciel kontinua halo abuzu sexual ba labarik sira, maibe nia mos kontinua koalia makaas kona ba Micel nudar ema ida mak hatama osan barak ba igreja.

Iha Papa Benedicto XVI nia tempu, bainhira liu tiha dekada ida resin, vitima barak relata hahalok at padre Maciel nian. Iha tinan 2006, Papa Bendito obrigatoriamente tenke foti desizaun hodi haruka padre Maciel ba konfinamentu, atu reza no halo penitensia. Desizaun Papa Bendito nian mai hosi investigasaun ne’ebe halo hosi Kongregasaun Dutrina ba Fiar nian. Ho konsiderasaun ba Maciel nia idade, no nia kondisaun saude, Kongregasaun la hasai nia hosi padre.

Tinan ida ho balun liu tiha, iha 2008, Maciel ho idade 86 mate sein iha justisa ba vitima sira. Hafoin Padre Maciel mate tiha ona, Vatikanu halo investigasaun no hetan katak Maciel mate ho fen nain 2 no oan nain 6. Nia visita bebeik nia fen sira no oan sira no sempre haruka osan ba sira. Nia mos padre ida mak uza droga tan iha tinan 1956 nia tenke tama ospital tan nia aditivu ba morfin. Padre Maciel nia hahalok abuzu sexual ba labarik sira hetan protesaun makaas hosi nia amo lulik maluk sira, liliu amo lulik sira mak halao knar besik ba Papa Joao Paulo II.

Iha tinan 2010 Vatikanu harii tiha Komisaun ida hodi halo avaliasaun ba Legião de Cristo nia servisu sira. Iha avaliasaun ne’e Vatikanu denunsia katak padre Maciel kria tiha “Sistema ba Poder” atu fasilita nia lideransa ho “Vida Dupla Mak Imoral” no mos hodi fasilita nia ba halo abuzu sexual ba labarik mane sira. Vatikanu mos hatete katak Legião ne’e establese “Mekanizmu Defesa” iha nia sorin-sorin hodi proteze nia hosi akuzasaun sira no hodi fo presaun ba vitima sira atu la halo keisa. Ida ne’e halo Maicel sai intokavel ka untouchable.

Legião de Cristo funda hosi Maciel bainhira nia idade 20. Legião ida ne’e harii eskola katoliku sira no organizasaun karitativu sira iha rai 22, liu hosi nia rede padre sira hamutuk 800 resin no seminaristas 2,600. Nia movimentu naran Regnum Cristi iha membru 75,000 resin.

* Halibur hosi publikasaun sira iha:

Print Friendly, PDF & Email

LEAVE A REPLY

Please enter your comment!
Please enter your name here