Reportajen Umbelina dos Reis
Sekretáriu Estadu Formasaun Profesional no Empregu (SEFOPE) liu hosi Diresaun Nasional Empregu Exterior (DNEE) hamutuk ho delegasaun Ministru Traballador Korea hahú teste skill, fiziku ba joven Timor-oan na’in 490 ne’ebé pasa ona teste lian Korea.
Diretor Diresaun Nasional Empregu Exterior (DNEE), Filomeno Soares hateten, atividade ne’e ohin ekipa SEFOPE hamutuk ho delegasaun hosi Ministru Traballador Korea fo teste skill ba kandidatu joven Timoroan ne’ebé foin lalais tuir teste liu ona ne’e, durante loron haat hahú 19/09.
“Kandidatu refere tuir teste skill fíziku sei fahe ba sesaun kada loron ida atende ema na’in 100 mak tuir teste, maibé iha planu realizasaun teste fiziku ne’e hosi delegasaun Ministru Traballador Korea nian mak mai organiza direita, nune’e kandidatu refere ne’ebé tuir teste skill feto na’in 20 no mane na’in 470, total hamutuk 490, nune’e mos kandidatu sira ne’e dokumentu no passaporte kompletu ona.” Dehan Diretor Diresaun Nasional Empregu Exterior (DNEE), Filomeno Soares ba Jornalista sira, iha Edifísiu SEFOPE Becora, tersa-feira, 19/09.
Nia informa katak, ekipa ne’ebé fo teste ba kandidatu Timoroan sira ne’e hotu-hotu uza kartaun mak foin tama ba salaun laran, nune’e disiplina teste skill nian ne’e mais rigorozu tebes, nune’e teste skill ne’e laiha sistema familiarizmu.
Diretor ne’e nia mensajen ba kandidatu sira katak karik tuir teste mak la passa lalika pesimista maibé nafatin iha optimista hodi hein oportunidade tuir mai, loron ida imi nia mehi hakarak ba servisu iha Korea ne’e sai realidade.
Diretor EPS Center HRD Korea, Mr. Park Sehoon haktuir, valor ne’ebé mak foti atu fo ba estudante sira mak sei foti hosi sistema automátika ne’ebé iha ona tablet hosi vizilante no orientador hodi haree ba rezultadu teste final otomatikamente sei tama iha sistema no kriteria selesaun dokumentus la’os haree ba diploma maibé haree ba estudante nia valor.
“Objetivu primeiru teste skill ida ne’e foti estudante nia valor ba teste lian Korea no haree mos estudante nia kapasidade no fiziku ba data pessoal nia altura no todan, nune’e iha vontade hodi ko’alia lian Korea oinsá no haree imajen sira hodi haruka ba emprezariu sira iha Korea.” Nia dehan.
Nia informa, teste ohin loron hanesan teste skill ida ba estudante Korea sira ne’ebé mak passa ona iha lian Korea hodi konfirma ona sira ninia lista prezensa hodi fo númeru ba estudante sira tuir teste skill depois tuir tan teste fíziku, ikus liu mak fo entrevista ba estudante sira.
Kandidatu estudante Korea, Isabel Patrisio Mendes hateten, sente orgullu tebes tanba bele hetan oportunidade ida ne’e hodi tuir teste skill lian Korea nian.
“Mezmu durante ne’e ha’u tuir aula aprendijazen lian Korea nian hasoru dezafiu oin-oin maibé ha’u esforsu nafatin to’o ohin loron ha’u naran sai tuir teste duni, mezmu sei iha prosesu kompetisaun nia laran maibé sente agradese nafatin ba oportunidade ida ne’e.”
