Plataforma Nasionál Bee, Saneamentu, no Ijene (BESI) halo audénsia ho komisaun E parlamentu-nasionál hodi hato’o auditoria sosiál ne’ebé deskobre katak fornesimentu no asesu bee-moos nafatin sai preokupasaun, nune’e iha elaborasaun orsamentu jerál estadu 2024 tenke tau konsiderasaun nomós presiza halo jestaun no kontrollu ba sistema bee-mos ne’ebé kuidadu teb-tebes.
Koordenadór Nasionál Plataforma BESI Januario Amaral hateten, durante ne’e sira halo observasaun hodi deskobre progresu dezenvolvimento seitor bee no saneamentu iha Timor Leste ne’e sira hato’o ba parlamentu-nasionál komisaun E atu iha elaborasaun orsamentu jerál estadu tinan 2024 bele integra asuntu bee saneamentu no ijene ne’e iha alokasaun orsamentu jeral estadu tinan 2024 nian, nune’e mós hato’o rezultadu auditoria-sosiál ne’ebé hala’o ona iha tinan kotuk liuliu fornesimentu bee-moos iha munisipiu 3 iha area rural nian, sira hatoo dadus deskobrimentu sira ba iha komisaun E tanba sira maka trata asuntu infraestrutura bazika sira.
“BESI hamutuk ho nia membru sira hanesan HAK, FHTL inklui parseiru WaterAid hodi hato’o nia monitorizasaun no servisu hamutuk iha fornesimentu be’e saneamentu no ijene iha munisipiu sira, nomós liga ba advokasia ba alokasaun orsamentu jerál estadu kada tinan iha bee no saneamentu ho mós planu politika sira” dehan koordenador BESI Januario ba jornalista sira iha PN, (20/09).
Nia dehan tan, durante hala’o auditoria-sosial iha baze deskobre mos sistema balun ne’ebé sai problema boot maka fornesimentu bee ne’ebé seidauk adekuadu no asesivel, iha sistema sira ne’ebé halo auditoria kuaze la asesivel ba feto, ema venerable, ema ho difisiente sira, nunee mós fornesimentu bee ne’ebé la regular, dalaruma iha tempu bailoron rekursu bee la naton atu fornese bee ne’ebé regular no susar ba komunidade sira atu asesu ba iha bee tanba nee sira tenke ba kuru bee iha mota.
“Sistema ne’ebé ami halo auditoria-sosial ba ne’e grupu maneja fasilidade ne’ebé tuir dekretu lei nu. 04/2004 ne’ebé hateten katak sistema sira iha bee rural komunidade mak sai nain liuhusi grupu maneja fasilidade kuaze grupu nee la funsiona, tanba gurpu ne’e servisu ho voluntáriu ho ida ne’e sira labele atende nesesidade ne’ebé sira iha, nunee sistema operasaun no manutensaun la funsiona ho di’ak” dehan Januario.
Fatin hanesan Diretór Asosiasaun HAK Feliciano Araujo haforsa tan katak, iha alokasaun orsamentu jerál estadu 2024 tenke tau konsiderasaun atu jestaun bee no saneamentu bele fornese bee ba komunidade sira ho adekuadu, tau mos atensaun ba iha sosiedade sira ne’ebé kontinua boor-bee koa-kanu tuir sira nia hakarak nee presiza tau hanoin, atu labele implika ba ema seluk nia asesu ba bee-mos nunee bele asesu bee ho iguál.
