Reportajen David da Costa
Konselleiru Másimu Partidu Kmanek Haburas Unidade Nasionál Timoroan (KHUNTO) José dos Santos Naimori Bucar, hateten, ohin nasaun ida presiza lideransa hotu-hotu tenke iha unidade ida, atu nune’e, Governu ida agora bele halo nia planu ho diak ba iha futuru.
“Ohin Hau ho estrutura Partidu, ami mai hasoru Presidente Republika José Ramos-Horta, atu rona nian haoina atu kria paz no dame iha rai ida ne’e, hari’i unidade nasionál ida entre politik na’in sira. Presiza ita hotu-hotu rona husi xefe estadu, ita nia prezidente rasik, atu nune’e ita hotu-hotu bele komprende saida maka politiku, oinsa atu asegura estadu ida. Tanba ne’e, nasaun ida, presiza lideransa hotu-hotu tenke iha unidade ida, Para atu nune’e ita nia governu ida ne’ebé oras ne’e maioria, oinsa maka sira iha planu diak ida ba futuru ne’ebé diak,” dehan Konselleiru Másimu Partidu KHUNTO, José dos Santos Naimori Bucar, ba Jornalista sira hafoin remata enkontru ho Xefe Estadu José Ramos-Horta Iha Palasiu Prezidénsiál Bairo-Pite, Kinta 21/03.
Tanba ne’e nu’udar politiku nain sira tenke kria pas ho dame, laos deit haree deit ba iha politika, maibé tenke mai ho sentidu estadu para bele kontribui ba estadu ne’e ho diak. Tanba estadu ne’e povu ninian. Ne’ebé xefe estadu nu’udar ema Novel da Pas ida, hotu-hotu presiza rona nian, tanba nia esperensia ne’ebé boot tebes ba rai ida ne’e, no autor ba rai ida ne’e hotu, atu nune’e nian fo hanoin ba politiku nain sira para bele komprende saida maka estadu, saida maka unidade nasional, ida ne’e maka KHUNTO presiza hakarak rona husi presidente rasik.
Nune’e mós Konselleiru Másimu Partidu KHUNTO ne’e, hateten, hanesan jerasaun foun tenke estuda buat ne’ebé loos, labele sai inimigu iha polítiku ho nune’e sei apoiu tomak bá iha nunu Konstitusionál ninia mandatu.
“Uluk bainhira maun boot Xanana ho maun Taur Matan Ruak iha diverjénsia polítika, ha’u hateten ha’u sei la hamonu maun Taur Matan Ruak iha VIII Governu, no agora iha Nunu Governu mós hau sei la hamonu maun Xanana Gusmão, tanba ita presiza estadu ida ne’ebé maka maduru, tanba estadu ne’e povu ninian, povu maka fó julga, povu maka fó fiar ita tenke respeita ida ne’e, ita labele dehan katak nia uluk be ladiak, lae, politik ida ne’e ita labele halo hanesna ne’e, politika fó ba povu maka julga ita tenke respeita ida ne’e,” nia esplika.
Aliende ne’e mós Konselleiru Másimu Partidu KHUNTO konvida Prezidente Republika atu partesipa iha sira nian kongresu nasional iha dia 20 no 21 abril tinan ida ne’e. No Xefe estadu sei ba loke abertura atu nune’e bele hato’o hela mensajem ruma ba Partidu nia ema sira.
“Prezidente mós fo mensajen ba partidu KHUNTO, atu halo preparasaun ba kongresu Nasionál ne’e ho diak, atu hili lider partidu KHUNTO nian foun ida diak para bele komprende, labele ida-idak koalia ninian maibé presiza lideransa jerasaun foun ida ne’ebé diak,” nia dehan.
