Home Notisia CGT: Impaktu Hosi SS Afeta Ba Folin Ai-han Baziku Sa’e Iha Municipio...

CGT: Impaktu Hosi SS Afeta Ba Folin Ai-han Baziku Sa’e Iha Municipio Sira

913
0
CGT Iha press conference. [Foto: CGT | 19.05.2021]

Reportajen Zevonia Vieira

Liu hosi komunikadu imprensa Core Group Transparency Timor-Leste (CGT-TL) deklara katak apresia ba intervensaun governu hahú hosi inísiu bainhira moras surtu COVID-19 invade Timor-Leste, governu hahú kedas aplika ona Estadu Emerjénsia (EE) to’o ohin loron, nudár esforsu hodi prevene no hakotu moras ida ne’e atu labele hada’et tan ba ema seluk.

CGT hateten mekanizmu ka meius barak ne’ebé governu foti ne’e, ho intensaun ne’ebé di’ak tebes, atu salva sidadaun sira nia vida moris, maske ohin loron nia númeru moras kontinua sa’e no konsege hakotu ona ema balun nia vida.

Maibe CGT hateten mos katak iha parte balun hosi ami nia observasaun no peskiza ne’ebé Sekretariadu Core Group Transparency hamutuk ho nia membru Mata Dalan Institute (MDI) hala’o ba implementasaun serka sanitaria iha munisipiu neen (Baucau, Covalima, Ermera, Covalima, Bobonaro no Lautem) hatudu katak, meius ka polítika sira ne’ebé foti, fó ona impaktu negativu lubuk ida iha sosiedade alende impaktu pozitivu, “inklui mós hosi ami nia observasaun hatudu katak, iha sosiedade ne’ebé tuir loloos nia nivel konxiénsia makaas hodi kumpre regra Estadu Emerjénsia, maibé realidade laiha.

Hosi peskiza ne’ebe CGT ho nia parseiru sira halo deskobre katak, alende iha efeitu pozitivu ba aplikasaun regulamentu ne’ebé sosiedade sira tenke kumpre hodi halo mitigasaun ba katastrófika situasaun saúde rai laran nian, maibé iha periodu serka sanitaria no konfinamentu lori ona impaktu negativu ba povu kbiit laek sira.

Ho limitasaun movimentu husi ema no transporte públiku nian halo komunidade sira nia reziliénsia ba moris iha risku nia laran, inklui mós ba komunidade balun ne’ebé hola parte iha vida negósiu ne’ebé kuaze depende maka’as ba sirkulasaun transporte hodi lori produtu agrikultura no nesesidade bázika sira seluk hosi kapitál Dili ba Munisipiu no entre entre munisipiu seluk, inklui mós ba konsumidór sira.

Implikasaun seluk mak transferénsia sasán ka nesesidade bázika hosi transporte ida ba transporte seluk, halo sasán nesesidade bázika nia folin hahú sa’e makas, kauza hosi komunidade ne’ebé fan tutan tenke selu transporte ho folin karun dala rua to’o dala hat, hanesan akontese transporta sasán hosi Munisipiu Covalima – Dili tenke transfere sasán to’o dala hat no Dili – Lospalos tenke transfere dala tolu to’o dala hat, ne’ebé antes ne’e sira transporta ho direta dala ida. Impaktu husi transferénsia ne’e halo foos folin sa’e maka’as hanesan foos Globus 25Kg inisiu ho 2 folin $13.50 negosiante sira balun hasa’e nia folin $15.50 ate $18. No sasán folin ne’ebé sa’e la’ós de’it foos, maibé mós nesesidade báziku sira seluk.

Iha komunikadu imprensa laran mos esplika katak iha tempu hanesan kapasidade kompras hosi komunidade menus liu ne’ebé fó impaktu ba ema la sosa nune’e sasán no produtu balu hetan hetan estragu, tanba folin makas nune’e konsumidór balun deside hili opsaun seluk ne’ebé nia kapasidade to’o no la nesesariamente tenke konsumu. Hanesan modo repollu, fehuk ropa, liis, señora ai han sira seluk, nune’e modo sira ne’e sai estragu hotu. Ho realidade husi situasaun ne’ebé iha, ami rekomenda ba governu presiza muda ka revee fali regulamentu ba transferénsia sasán entre munisipiu sira ho transferénsia direta dala ida ba fatin ka destinasaun ne’ebé atu to’o ba, nune’e bele hafasil mekanizmu transportasaun nesesidade báziku sira husi fatin ida ba fatin seluk iha territóriu nasionál.

Maibé nafatin aplika protokolu ne’ebé Ministériu Saúde fó sai, hodi halo teste swab ho rapidamente no hamenus burokrasia naruk no kleur atu ajente ekonómiku sira nafatin hala’o sira nia atividade, hodi nune’e bele ajuda normaliza folin sasán iha territóriu nasionál no ajudu minimiza risku vulnerabilidade husi komunidade kbiit laek sira ne’ebé Lakon sira nia oportunidade husi situasaun ida ne’e.

CGT rekomenda ba governu atu fasilita ajente ekonómiku sira ho lais, fasilita trata dokumentu gia de marxa iha loron ida nia laran inklui mós teste swab, atu nune’e atividade ekonomia rai laran bele la’o nafatin no labele hamosu problema sosiál sira seluk.

Hosi CGT nia rezultadu peskiza deskobre mós katak, husi Estadu Emerjénsia hosi faze primeiru ate ohin loron, ajente ekonómiku informal sira ne’ebé durante no antes EE ho rendimentu $0.50 – $1.00/loron balun mós la hetan, tanba osan ne’ebé utiliza hodi hala’o sira nia atividade kuaze halo kréditu ba ajente ekonómiku sira balun ne’ebé durante ne’e apoia hodi fó kréditu. Kada fulan tenke fó fila osan funan inklui nia kapitál ho valór $48.90 no balun mós tenke fó fila ho valór $85.00 depende hosi valór ka montante ne’ebé sira foti.

Ho valór ne’ebé termina, obriga ajente ekonómiku informal sira tenke buka meius hodi selu, maske la konsege hetan rendimentu no balun mós tenke obriga família ho pasiénsia la han hodi rai nune’e bele selu kréditu, no balun mós tenke obriga an deve fali iha fatin seluk hodi taka tusan husi kréditu tanba ajente sira ne’ebé fó kréditu la fó toleránsia maske situasaun ohin loron obriga sidadaun sira lubuk balun hamlaha tanba laiha rendimentu, no balun tenke hetan moras tanba iha presaun psikolojia tanba la konsege selu ema nia kréditu ho lalais.

Bazeia ba problema ne’ebé ajente ekonómiku informal sira hasoru liga ba kréditu sira ne’ebé halo, CGT rekomenda ba governu atu buka mekanizmu ida oinsá atu identifika ajente sira ne’ebé durante ne’e fó kréditu ho atividade legal atu bele fó tempu ba creditor sira no hatún nia funan durante EE, atu alende sira bele fó fila osan maibé iha parte ida, sira mós bele moris ho rendimentu ne’ebé laiha serteza.

CGT observa iha terrenu ba munisipiu sira iha fatin entrada entre munisipiu, hatudu katak reprezentante povu ka Deputadu/a balun la kumpre rekizitu sira ne’ebé governu kria, Deputadu/a, ne’ebé tuir loloos nia nivel konxiénsia makas liu ona, maibé iha pratika laiha.

Iha viajen ba kada munisipiu, rekizitu ne’ebé tenke kumpre mak hatudu rezultadu teste Swab ba seguransa sira iha fatin entrada (seguransa no ekipa saúde sira iha) hodi justifika laiha moras nune’e bele halo viajen, maibé Deputadu/a balun 3 ho nia karreta MP-88 liu nein hatudu dokumentu no liu de’it, hatudu hahalok at no vandalizmu ne’ebé la kumpre regra. Ho hahalok sira hanesan hatudu katak ita la kumpre regra sira ne’ebé iha no sosiedade ida ne’ebé ami konsidera kontribui hodi espalla ka fahe tutan moras ne’e ba sidadaun sira seluk, nune’e ami rekomenda ba Deputadu/a sira favór kumpre regra sira no hatudu ita boot sira nia klase hanesan deputadu ne’ebé nia nivel konxiénsia maka’as liu, se ita boot sira iha regra espesífiku hodi fó espasu livre (movimentu), presiza esklarese ba públiku atu públiku hatene no labele duvida katak ita boot sira viola hela regra Estadu Emerjénsia

Print Friendly, PDF & Email

LEAVE A REPLY

Please enter your comment!
Please enter your name here