Reportajen Umbelina dos Reis
Alumi Parlamentu Foinsa’e Timor-Leste (APFTL) kolabora hamutuk ho Oxfam Timor-Leste realiza diálogu aberta no expozisaun produtivu iha rai laran, ho tema “Investe iha setór produtivu hodi diversifika ekonomia Timor-Leste.”
Prezidente APFTL, Zaulino Gomes da Silva informa katak APFTL sempre halo advokasia ho setór produtivu hahú tinan hirak liu ba, oinsá diversifika ekonomia iha rai laran.
“Setór ekonomia dau-dauk ne’e nafatin sai ema hotu nia preokupasaun iha públiku, tanba reseita fontes fundu mina rai sei la dura iha tempu naruk, nune’e liu hosi espasu sira hanesan ne’e, oinsá fó hanoin nafatin ba governu hodi tau prioridade ba setór ekonomia iha rai laran.” Dehan Prezidente APFTL liu hosi nia diskursu iha edifísiu MJDAK, Largo Lecidere, sexta-feira, 12/04.
Nia dehan, papel Juventude ne’e importante tebes tanba dala-barak públiku nia julgamentu ba joven katak joven mak autor ba krime, maibé la haree ba parte seluk katak joven balun ne’ebé hala’o atividade iha setór produtivu hodi kontribui ba nasaun. Nune’e APFTL oinsá kria no fó espasu ba joven produtivu no ema ho difisiénsia sira hodi hakbesik sira nia lian ba ukun na’in sira katak joven maioria mak sei inklina an iha setór produtivu hodi kontribui ba nasaun.
APFTL halo ona mapamentu iha teritóriu Timor-Leste, bazeia ba dadus joven produtivu sira ne’ebé eziste iha grupu setór ekonomia total por volta 440 ital. Grupu hirak ne’e governu presiza buka hodi halo estimula nune’e diversifika sira nia inisiativa. Tanba setór ekonomia mos kontribui ba ekonomia nasaun nian, nune’e presiza governu nia prezensa hodi hadi’a dezemvolvimentu ba futuru.
“Tanba grupu joven produtivu maioria mak hatudu ona sira nia prestasaun iha nasaun ne’e.” Nia dehan.
Iha fatin hanesan reprezentante Oxfam, Adilson da Costa Junior hateten, oxfam sai hanesan sentru hodi kria espasu no halo diálogu entre joven no polítiku na’in sira, tanba ita hatene katak ita nia ekonomia kontinua depende ba petroliferu maibé sei la dura iha tempu naruk.
“Liu hosi diskusaun hirak ne’e ita bele buka opsaun alternativu sira, nune’e APFTL bele mobiliza rede koligasaun agrikultura ne’ebé ohin marka iha fatin refere.” Nia dehan.
