Reportajen Silvino Freitas
Timor Leste nia rangkin liberdade imprensa tun kauza husi asaun polísia ne’ebe kaptura jornalista sira bainhira jornalista sira halo kobertura ba asaun krusial sira ne’ebe akontese iha terenu, liuliu hahu akontese evikasaun iha sidade Dili, Prezidente Repúblika José Ramos-Horta konsidera lia hirak nee iha ambitu selebrasaun tinan 50 trajedia ne’ebe hamate jornalista estranjeiru nain 5 iha Balibó Bobonaro husi militar Indonesia iha loron 16 fulan outubru tinan 1975.
Prezidente Repúblika Jose Ramos-Horta dehan, ita nia rangkin liberdade imprensa iha mundu sae maibe dalaruma mos monu, tanba ne’e tenke haree ba rangkin liberdade imprensa ne’ebe mos monu fali tanba saida mak tun, nune’e mos iha politika ne’ebe ho forsa konjunta halo evikasaun iha dalan dalan sira iha Dili laran hodi kaer mos jornalista sira ba halo interogasaun iha polísia.
“Loloos polisia sira tuur iha neeba jornalista sira ne’ebe polísia kaer ne’e mak entrevista polisia” dehan Prezidenti Repúblika José Ramos-Horta iha ambitu enseramentu komemorasaun tinan 50 trajedia Balibó, (16/10).
Nia dehan tan, tuir loloos asaun evikasaun ne’ebe akontese jornalista sira tenke halo kobertura tanba evikasaun ne’e akontesimentu ida ne’ebe jornalista sira tenke halo kobertura, nune’e iha eventu sira hanesan akontese evikasaun jornalista sira tenke marka prezensa, ho asaun sira nee mak halo rangkin liberdade imprensa monu.
“Espera ita aprende ho lisaun ne’e husik jornalista sira servisu ba, la signifika katak buat hotu neebe jornalista hakerek ne’e biblia lae, buat ruma ne’ebe sala laos jornalista iha Timor-Leste deit iha mundu ne’e hau konese iha Amerika Europa mos iha problema oioin” dehan PR Horta.
Nia konklui, Timor-Leste nasaun ne’ebe demokratiku tanba ne’e tenke iha demokrasia ne’ebe dinamiku nune’e nia orgullu ba media no orgullu ba demokrasia tanba ne’e tenke iha imprensa livre maske iha failansu, iha governu neebe livre maske iha fallansu, iha parlamentu ne’ebe rungu ranga duke iha parlamentu ne’ebe ema hotu konkorda malu basa liman.
