Home Notisia 20 Maiu ho COVID, PR: Ita Tenke iha konxiénsia COVID Sei La...

20 Maiu ho COVID, PR: Ita Tenke iha konxiénsia COVID Sei La Lakon iha Tempu Badak

308
0
Prezidente Republika, Dr. Francisco Guterres Lu Olo. [Foto: Media PR | 20.05.2021]

Reportajen Zevonia Vieira

Povu Timor selebra loron restaurasaun ba 19 iha situasaun surtu COVID-19, liu hosi mesajem Prezidente Republika, Dr. Francisco Guterres Lu Olo hateten katak

Ohinloron ita hasoru hela vírus COVID-19 nian, ne’ebé da’et ona iha munisípiu hotu no iha RAEOA, Prezidente Repúblika hakarak konvida sidadaun hotu atu halo refleksaun ida kona-ba ita-nia perkursu ka dalan ne’ebé ita lao ona, nu’udar povu no nasaun ida.

Prezidente Lu Olo dehan loron sia hafoin ita deklara ita-nia independénsia iha 28 novembru 1975, ita hasoru luta naruk ida ne’ebé nakonu ho terus oin-oin durante tinan ruanulu resin haat nia laran. Situasaun ne’ebé ita hasoru iha tempu ne’ebá obriga ita atu adapta lalais ba realidade ne’ebé ita hasoru no ita konsege organiza an ho meius ne’ebé iha, hodi hasoru no hakaat liu dezafiu no terus hotu-hotu.

Hahú ho rezisténsia armada iha ai-laran, estende ba sidade laran, no ba esteriór, ka rai-li’ur. Iha tempu ne’ebé joven Timoroan hahú sai ba eskola iha Indonézia lori mós rezisténsia ba iha ne’eba hodi forma movimentu rezisténsia estudantil no atrai mós solidariedade husi demokrata indonéziu sira. Ho Frente tolu  – Frente Armada, Frente Klandestina no Frente Esterna/Diplomátika – maka ita forma Rezisténsia ida de’it husi Povu Timor-Leste hodi manán funu naruk ida, nakonu ho dezafius,  terus no mate, no ikus, ita Restaura ita-nia Independénsia, iha serimónia, iha Tasi-Tolu, iha loron 20 fulan maiu tinan 2002!

Nia dehan ohinloron nu’udar povu no nasaun ida, ita hasoru dala ida tan, dezafiu boot ida ne’ebé lori mai ita insertezas no terus barak. Pandemia Covid-19 ne’ebé afeta mundu tomak no da’et lalais lós husi ema ba ema no husi país ida ba país seluk, hahú iha fulan Dezembru tinan 2019. Vírus  Corona da’et ona ba ema liu tokon atus ida neen nulu no to’o ohinloron hasai ona ema nia vida, liu tokon tolu.

“Iha ita-nia país, ita halo ona esforsu barak hodi evita vírus Corona da’et ba ita-nia sidadaun sira. Biar nune’e, ohinloron ita tama ona ba kategoria transmisaun komunitária, iha munisípiu Díli. Ema ne’ebé hetan pozitivu ho vírus Covid-19 nian  to’ o  ona 4949, sura husi 21 Marsu 2020 to’o 19 Maiu 2021. Kazu ativu iha 19 Maiu 2021 hamutuk hotu 2302.  Ita lakon ita nia belun nain 11 ne’ebé mate ho Corona vírus”, dehan Prezidente Lu Olo liu hosi mesajem ofisial, 20/05.

Nia fo hatudu ezemplu ne’ebé asiste iha país seluk, iha rejiaun no iha kontinente hotu-hotu, ita tenke iha konxiénsia katak COVID-19 sei la lakon iha tempu badak. Nune’e, ita tenke adapta no aprende moris ho situasaun ida ne’e.

Print Friendly, PDF & Email

LEAVE A REPLY

Please enter your comment!
Please enter your name here