Home Notisia PNTL ho Xefe Suku Colmera Verifika Joven 14 Tama Ilegal, Jose: Ami...

PNTL ho Xefe Suku Colmera Verifika Joven 14 Tama Ilegal, Jose: Ami Prontu Ba Kuarentena

914
0
imajen sorin Xefe Suku Colmera, , Armenio Aleixo da Silva no imajen sorin PNTL ho komunidade sira iha Colmera. [Foto: Zevonia Vieira | 09.09.2020]

Reportazen Zevonia Vieira

“Momentu ami tama mai ne’e, ami la informa ba parte saude nian, tanba ami sente ami diak hela no la kona virus COVID-19, ami mai uma mos ami hela iha uma ida ho familia sira, tanba ami fiar katak ami negativu, tanba se ami positivu ami mos tauk lakohi besik ami nia familia no atu estraga fali ami nia familia. Se parte seguransa no saude nian mai hodi lori ami ba kuarentena ami pronto koopera”, Jose da Costa.

Polisia Nasional Timor-Leste (PNTL) halo inspensaun ka verifikasaun iha parte suku Colmera, tanba tuir informasaun iha joven nain 14 ne’ebe mak halo viajen ba Atambua-Indonesia no fila fali mai Timor ona iha loron 3 Septembru, tanba tama sai ho dalan illegal.

Neon Metin to’o iha fatin ne’ebe polisia sira halo verifikasaun iha bairo Colmera no halo entrevista ho Xefe Suku Colmera, Armenio Aleixo da Silva hodi hetan klarifikasaun ba akontesementu ida ne’e.

Ba Neon Metin Xefe Suku Colmera, Armenio Aleixo da Silva hateten katak nudar xefe suku iha responsabilidade ba nia komunidade.

“Hau la koalia konaba arte marisiais maibe hau koalia konaba hau nia komunidade. Iha oras 15:30 iha loron 9 Septembru, hau simu informasaun hosi Casa Military, sira husu dehan hau simu informasaun ka lae?, pois sira dehan ita boot nia komunidade joven sira tama sai iha fronteira, sira ba no sira fila fali mai ona no laiha konnesementu”, Maibe Xefe Suku hatan ba Casa Military katak laiha informasaun refere no la hatene.

Xefe Suku hatutan katak parte seguransa hatudu deit naran sira ne’ebe mak tama sai no iha lista naran ne’ebe mak iha, hakerek tuir naran bolu iha uma nian, “entaun hau lori duni komandante polisia sira hodi mai justifika, klaru katak hau nia joven sira iha ne’e duni hamutuk nain 14 ne’e inklui feto ida”.

Xefe Suku afirma katak atu ba Atambua ka ba ne’ebe hau la hatene, sai sa loron fila, fila sa loron hau la hatene , hau so hatene parte seguransa sira mai ohin para atu justifika no realidade iha duni, “hau koalia konaba hau nia komunidade no juventude, hau nudar autoridade lokal, hau la dehan katak sira ba ne’e halo saida”.

Xefe Suku konfesa katak hosi akontesementu ne’e konsege halo aprosimasuan ho juventude sira hamutuk nain 14,  halo justifikasaun katak sekarik imi halo hanesan ne’e tenke sumbete ba lei Estadu Emerjensia konaba moras COVID-19 ne’ebe akontese iha mundu tomak.

Xefe Suku dehan ida ne’e mak tenke kumpri, tanba komunidade trauma ba moras Corona, tanba ne’e mak autoridade lokal serbisu hamutuk parte seguransa nian, hodi justifika no bele lori sira ba kuarentena, hodi asegura sira no ses hosi virus Corona no labele daet ba ema seluk, “sekarik sira positivu ne’e perigozu, maibe sekarik sira negativu graca de deus, entaun ita hotu bele livre hosi moras ne’e. Hau preokupa liu ho virus Corona, ida ne’e importante”.

Iha fatin hanesan Neon Metin dadalia ho joven ne’ebe ba hamutuk ho joven sira seluk, hodi ba halo atividade iha Atambua, hodi hetan klarfikasaun. Ba Neon Metin membru PSHT, Jose da Costa ne’ebe hela iha suku Colmera klarifika katak iha loron 1 Agostu joven hamutuk nain 14 inklui feto maluk ida, haka tba Atambua hodi tuir pengesahan (graduasaun) ba membru PSHT sira ho dalan illegal (jalan tikus)

“Ami lao ba Indonesia – Atambua laos signifika kata kami atu lori COVID-19 mai Timor, maibe ami ba tuir pengesahan ka graduasaun PSHT nian. Momentu ami iha ne’eba mos estadu Indonesia mos tau matan ba ami no nungka abandona ami iha sira nia rai tanba situasaun COVID-19, maibe sira hateten deit katak iha Atambua zona hijau (verde) hanesan iha Timor”, hateten Jose da Costa, iha Colmera 09/09.

Jose konfesa katak sira hakarak tama ba kuarentena bainhira fila mai Timor ida ne’e diak liutan, maibe sira hatene sira negativu tanba sira hetan kontrola diak hosi parte Saude nian iha Atambua

“Ami sai hosi ne’e loron 1 Agostu no ami fila fali mai loron 3 Septembru, momentu ami ba ne’e la uza pasaporte tanba batas taka, entaun ami uza jalan tikus deit no ami tama mai mos ho tikus hotu. Ami liu ne’e mak ami la hatene tanba rai nakukun, temi deit parte Maliana maibe ami la rekonnese fatin ida lao tuir ne’e”, hateten Jose

Nia afirma katak parte saude nian iha Atambua sira kontrola ami, pengesahan iha Atambua ne’ebe PSHT halo, hetan kontrola mos hosi parte saude nian, tanba hare hosi nasaun ida ba nasaun ida, maibe sira dehan kata oras ne’e dadauk kazu positivu laiha no timoroan sira ne’ebe tama sai jalan tikus ne’e maioria la hetan COVID-19 hotu.

Neon Metin konfirma tanba sa momentu tama la aprezenta bai ha parte segurnasa no Ministeriu Saude, hodi nune’e bele halo swab test? ba Neon Metin Jose hatan ami fiar katak ami la hetan virus Corona, tanba iha Atambua ema kontrola ami bebeik

“Momentu ami tama mai ne’e, ami la informa ba parte saude nian, tanba ami sente ami diak hela no la kona virus COVID-19, ami mai uma mos ami hela iha uma ida ho familia sira, tanba ami fiar katak ami negativu, tanba se ami positivu ami mos tauk lakohi besik ami nia familia no atu estraga fali ami nia familia. Se parte seguransa no saude nian mai hodi lori ami ba kuarentena ami pronto koopera”, hateten Jose da Costa.

Neon Metin halo konfirmasaun mos ho parte seguransa nian ne’ebe iha fatin refere, ne’ebe halo ona esforsu hodi komunika ho parte Ministeriu Saude, hodi bele lori joven nain 14 ba iha kuarentena Tasi Tolu, maibe hahu hosi oras tuku 17:00 to’o oras 19:00 la hetan informasaun ne’ebe serteza no tuir informasaun hosi parte PNTL nian katak fatin kuarentena iha Tasi Tolu mos nakonu ona, mais menus iha ema nain 200 resin mak agora halao hela kuarentena iha fatin refere.

Neon Metin mos koko kontaktu ba Centru 199, hodi halo konfirmasaun parte vijilansia nian, maibe sedauk hetan informasaun kompletu tanba sedauk iha resposta hosi parte vijilansia ne’ebe tau matan ba ema sira ne’ebe mai hosi nasaun afetadu COVID-19

Oras ne’e dadauk joven nain 14 iha hela idak-idak nia iha Colmera bainhira fila hosi Atambua, maibe sira prontu koopera ho parte seguransa no Ministeriu Saude hodi ba hela iha kuarentena Tasi Tolu.

Print Friendly, PDF & Email

LEAVE A REPLY

Please enter your comment!
Please enter your name here