Reportajen Agustinha Amaral
Ministériu Saúde (MS) no Instituto Nasional Saúde Públika servisu hamutuk ho United Nations Children’s Fund (UNICEF) organiza treinamentu da-huluk kona-ba reforsa kapasidade atu responde ba misinformasaun iha Timor-Leste. Ida ne’e hodi responde ba informasaun ruma sirkula durante moras ida mosu, inklui informasaun falsu ka la loos iha ambiente dijitál no fíziku, ne’ebé fo impaktu ba ema nia desizaun sira atu asumi servisu saúde.
Tuir Diretór Jeral Saúde Ferderico Bosco hateten, treinamentu ida ne’e oinsá atu halo kapasitasaun ba iha pessoal saúde sira, hodi responde ba informasaun falsu sira mak espalla konabá saúde nian.
“Husi treinamentu ne’e atu hasa’e kapasidade Profisionál oinsá atu mellora di’ak liu hodi resposta hasoru informasaun sira as vezes, diriji sala ba komunidade, sira nia komportamentu ba iha saúde nian. Husi kazu ida ne’e ko’alia kona-ba misinformasaun, dezinformasaun hanesan Momentu Covid-19. Husi situasaun ida ne’e atu prepara di’ak liu tan profisionais saúde sira hodi kapasidade atu nune’e bele responde situasaun sira ne’e.” Dehan Diretór Jerál Saúde ba jornalista sira iha Aula Orchid, Timor Plaza.
Nia hatutan liu tan katak, iha treinamentu ne’e husi parte saúde sira mak hanesan, Servisu Sentral husi Ministériu Saúde (MS), Promosaun Edukasaun Saúde, Diresaun Nasional Materna Infatil, Media Komunikasaun, Protokolu, nomós Instituto Nasional Saúde Públika.
Iha fatin hanesan, represzentante UNICEF iha Timor-Leste, Ainhoa Jaureguibeitia hatete, “Ha’u hakarak hahú hodi kongratula Governu Timor-Leste liu husi lideransa Ministeriu Saúde nian, no Institutu Nasional Saúde Públika hodi organiza treinamentu dahuluk kona-ba reforsu kapasidade Ministériu Saúde kona-ba desinformasaun iha Timor-Leste.”
Nia dehan, bainhira COVID-19 deklara nu’udar pandemia globál iha fulan Marsu 2020, Governu sira iha mundu tomak servisu hamutuk ho parte interesada sira inklui Ajensia Nasoins Unidas no Organizasaun Sosiedade Sivil sira, hodi buka solusoens atu bele kontrola krize ne’e ho susesu.
“Iha tempu ne’ebá, iha mós medida importante oi-oin atu hapara virus ne’e no atu salva ema sira ne’ebé moras ne’e nia moris, maibé mundu hasoru problema oiin-oin mak Infodemia. Organizasaun Mundial Saúde esplika Infodemia ida tan informasaun barak liu mak sirkula durante surtu moras ida mosu, inklui informasaun falsu ka la loos iha ambiente dijitál no fíziku.”
“Iha Timor-Leste, ta’uk ne’ebé kria husi informasaun ne’ebé la loos ka desinformasaun, kontribui maka’as ba númeru tun kona-ba ema ne’ebé asesu ba servisu saúde esensiál sira hanesan servisu saúde inan no labarik, servisu imunizasaun, servisu planeamentu familiár no tratamentu ba malnutrisaun.”
UNICEF sei suporta treinamentu ba Ofisial Saúde Públika Munisipal husi ekipa Promosaun Saude, jestor sira husi programa imunizasaun, no pontu fokál sira husi ospital munisipal no sentru saúde komunitária sira. Ami halo estimasaun katak ema liu 150 sei hetan benefísiu husi treinamentu ne’e iha nasaun laran tomak.
“Husi trienamentu ida-ne’e, ami espera katak Ministeriu Saúde sei bele ofisialmente lansa Grupu Traballu Desinformasaun atu nune’e sira sei serbisu sistematikamente no lalais atu responde ba desinformasaun ka informasaun la loos, hodi evita informasaun la loos naklekar iha komunidade nia let, no fó impaktu ba ema nia desizaun sira atu asumi servisu saúde”.
Iha treinamentu semana ida ne’e, fasillita husi Ministériu Saúde (MS), Instituto Nasional Saúde Públika servisu hamutuk ho United Nations Children’s Fund (UNICEF), suporta mós husi United States Agency For Internasional Development (USAID), Departement of the Foreign Affairs and Trade (DFAT), hodi fó apoiu ba iha prosesu kapasitasaun ida ne’e.
