Reportajen Zevonia Vieira
Ministeriu Saude (MS) deteta tan kazu konfirmadu foun pozitivu COVID-19 iha loron 16 Maiu hamuutk 179. Liu hosi zoom press conference, Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr.Rui Maria de Araújo relata ba jornalista sira katak, dadus jeral ba loron ohin deteta kazu pozitivu hamutuk 179 (iha Dili 156 no iha municipio seluk 23.
Husi total kazu detetadu foun ohin mane 98, feto 81, husi total kazu detetadu foun ohin, hirak ho idade tinan 60 nain 6. Husi total kazu detetadu foun ohin, proporsaun kazu sintomátiku hamutuk 12,2%.
Total kazu konfirmadu kumulativu sura hosi tinan 21 Marsu 2020 to’o loron ohin hamutuk 4458, kazu rekupradu hamutuk 65. Total kazu ativu ohin iha nain 2116 no total kazu óbitu ba loron nain 2 ho detalles hanesan tuir mai katak mane idade 56 anus, hela iha Santa-Cruz, horiseik iha loron 15 Maiu, maizoumenus 11h00 dader, i’is-kotu iha serbisu fatin iha Fatuhada.
“Kolega serbisu sira informa ekipa vijilánsia epidemiolójika no ho autorizasaun familia nian halo swab post portem iha 11h31. Rezultadu hatudu pozitivu ho Cycle Threshold (CT) N gene 33,4, E gene 31,2. Familia deside atu lori ba hakoi iha Lospalos, tuir protokolu funeral ba ema ne’ebé mate ho Covid-19”, dehan Dr. Rui, 16/05.
Dr. Rui hatutan tuir informasaun husi familia, mate-bian iha istória tensaun-a’as, no la kontrola regularmente.
Kazu obitu seluk mane idade 58 anus, sidadaun xinés, hela iha Comoro ba HNGV iha loron 11 Maiu, ho isin manas maka’as, hafoin diagnostikadu sindroma insufisiénsia respiratória aguda (SIRA), ka susar/difisil atu dada-i’is no deteta SARS-CoV2 ho Cycle Threshold (CT) N gene 27,1, E gene 24,9.
“Hahu kedas kalan ne’e, halo tratamentu iha fatin izolamentu Vera Cruz, no horiseik loraik i’is-kotu, tanba fallansu respiratóriu (respiratoric failure) ho multiple organ failure. Familia ho embaxada Xina kordena hela ho ekipa CIGC-SS atu halo kremasaun”, dehan Dr. Rui
Nune ema ne’ebe halo teste PCR hosi horseik to’o ohin loron nain 781 no Dili kontinua hetan numeru boot ba surtu COVID-19 ho total kumulativu kazu konfirmadu hosi tinan 2020 to’o ohin loron hamutuk 3821 no total obitu hamutuk 10