Reportajen Zevonia Vieira
Ministeriu Saude (MS) deteta tan kazu konfirmadu COVID-19 iha loron 19 Maiu hamutuk 178. Liu hosi komunikadu imprensa, Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr.Rui Maria de Araújo relata ba jornalista katak kazu detetadu foun total 178 (iha Dili iha nain 147, iha municipo seluk nain 31).
Husi total kazu detetadu foun ohin nain mane 113 no feto 65. Husi total kazu detetadu foun ohin, hirak ho idade tinan ho idade 60 nain 6. Husi total kazu detetadu foun ohin, proporsaun kazu sintomátiku hamutuk 7,8%. Total kazu ativu ohin hamutuk 2302.
Kazu rekuperadu hamutuk 119, total kazu konfirmadu kumulativu hosi loron 21 Marsu 2020 to’o ohin loron total 4949. Total óbitu ne’ebé relata ohin nain 1, ho detalle hanesan tuir mai Mane idade 60 anus, timoroan moras durante semana 1 iha uma, ba HNGV iha loron 18 Maiu tamba i’is-bo’ot maka’as, diagnostikadu ho sindroma insufisiénsia respiratória aguda (SIRA), ka susar/difisil atu dada-i’is no deteta mós SARS-CoV2 ho Cycle Threshold (CT) N gene 26,6, E gene 25,1.
“Matebian iha istória Tuberkuloze ho mos diabetes ne’ebé la kontroladu. Hahu kedas iha loron 18 Maiu, halo tratamentu iha fatin izolamentu Vera Cruz ho oksijéniu liu husi Continuous Positive Airway Pressure (CPAP) iha ICU, maibé ohin dader 09:45 i’is-kotu, tanba fallansu respiratóriu (respiratoric failure) ho multiple organ failure. Familia koordena ona ho ekipa CIGC-SS atu halo hala’o funeral tuir protokolu ne’ebé iha”, dehan Dr. Rui, 19/05.
Husi horiseik mai ohin ema hamutuk 1038 ne’ebe halo teste PCR iha Dili. Kazu ativu iha Dili sae ba 1888, kazu ativu sae ba 11.