Reportajen Adalgisa Pereira
Komunidade iha suku Samalari, Postu Administrativu Laga, Municipio Baucau to’o ohin loron komunidade balun sedauk simu ai-han sesta bazika no balun simu deit mina no foos
Informasaun hirak ne’e hato’o hosi Xefe Suku Samalari, Luis Clementino Xavier ba Neon Metin, nia dehan iha suku Samalari, iha aldeia hamutuk hitu maibe aldeia ida mak seidauk simu, no aldeia rua mak sira simu deit foos no mina, tan ne’e ohin aldeia Sorugua foin simu produtu lokal no aldeia ida seidauk, “populasaun balun seidauk simu tanba naran iha lista laiha”.
Lideransa lokál ne’e mos hatutan katak sira nafatin eziji ba estadu, atu tau mos konsiderasaun ba populasaun ne’ebe mak seidauk simu programa sesta bazika.
“Ami nafatin eziji ba estadu li-liu diresaun Centru Lojístika Nasionál(CLN) atu tau mos konsiderasaun ba populasaun sira ne’ebe mak seidauk simu sesta bazika, tamba sira mos povu Timor, no sira mos afeta ba situasaun COVID-19 ida nee,” dehan Xefe Suku ba Neon Metin, iha sede suku, 18/05.
