Reportajen Adroaldo ‘Saretukau’
Komunidade Suku Fatisi, Postu Administrativu Laulara, Munisípiu Aileu kontinua preokupa ho kondisaun estrada aat, ne’ebe difikulta sira labele lori sira nia produtu lokal ba fa’an iha Dili, bainhira tempu udan
Problema ne’e hato’o hosi Xefe Suku Fatisi, Duarte do Rosário ba Neon Metin katak oras ne’e kondisaun estrada nakonu ho rai rahun, no fo impaktu ba komunidade iha tempu udan. “Instituto Gestão Equipamentos (IGE) mai dudu hela estrada maibé valeta la iha, la ateru, entaun udan mai difikulta nafatin ami atu asesu ba merkadu”, hateten Xefe Suku Fatisi iha nia rezidénsia 26/08
Nia hateten maski suku ne’e rasik baliza hela ho kapitál Dili maibé sira mós hasoru problema liu-liu asesu ba merkadu iha tempu udan, “Komunidade bele fa’an nia produtu, iha tempu ida ne’e agora nia bele lori nia produtu ba merkadu, maibé tempu udan nia la bele asesu ba Díli”.
Lider lokal ne’e hateten atividade prinsipál ne’ebé ni-nia komunidade agrikultor sira halo hodi hetan rendimentu mak fa’an produtu ai-fuan sira.
“Komunidade sira nia moris mak tenke batar, ai-fuan hanesan rambutan, durian oi-tuan, kafé no mos vanilla. Produtu ida agora nia di’ak liu mak produtu maek, maibé nia folin tun tiha ba $2.25, ida ne’e mos preokupa hela ba komunidade sira”, hateten Duarte.
Nia informa katakagora da-dauk sei bele lori tanba sei asesu hela ba estrada, mais kuandu udan tun sei labele hakur tanba mota boot, ponte laiha, labele atravesa hodi ultrapasa ba sidade, nune’e komunidade nia produtu sira la bele ba fa’an iha merkadu.
Iha fatin hanesan komunidade Suku Fatisi, Amélia da Conceição hateten problema estrada aat difikulta lori sira nia produtu ba merkadu iha tempu udan, “ami husu ba estadu atu estrada ne’e nahe kasar oi-tuan, ne’e para udan karik ami ba Bazar mos di’ak”, hateten Amélia.
Nia hateten oras ne’e da-dauk sira sei bele lori sira nia produtu ba merkadu, maibé tempu udan la bele ona. Nune’e nia husu parte relevante atu bele nahe estrada, halo ponte no valeta sira, nune’e tinan-tinan governu labele gasta osan ba estrada, alende ne’e sira mos bele asesu ona ba merkadu iha tempu udan, “atu nune’e iha udan karik ami bele fa’an ami nia sasán mos bele folin ho di’ak”.