Home Meio Ambiente Tesi Ai Fo Impaktu ba Natureza, Maibe Antonio Dezempregu, La Iha Opsaun...

Tesi Ai Fo Impaktu ba Natureza, Maibe Antonio Dezempregu, La Iha Opsaun Seluk

985
0
Antonio Pinto de Jesus moris husi faan ai-maran. [Foto: Joselina | 29.08.2021]

Reportajen Joselin dos Santos

Nesesidade uma laran obriga ema atu buka dalan, hodi bele sustenta uma laran, maski dalaruma fo konsekuénsia ba kondisaun balun, liu-liu meiu ambiente tanba tenke tesi ai hodi bele fa’an, nune bele hetan osan netik.

Antonio Pinto de Jesus moris kbiit laek ne’ebe hili moris faan ai maran, nune’e bele sustenta moris uma laran nian. Kada loron Antonio tesi ai iha foho lolon Lakasa, aldeia Mota-kiik suku Hera postu administrativu Cristo Rei, munisípiu Dili nune’e bela fa’an

“Kada loron ami sempre ba tesi-ai matak, iha foho lolon Lakasa depois lori mai uma, ami tesi halo badak,  habai semana ida ho balun, maran tiha mak ami foin fa’an, futun ho folin ida 0.10 centavos, loron ida ami hetan $10.00 ba leten osan hirak ne’e ami uza hodi responde ba ami nia kabun,” dehan Antonio Pinto de Jesus  ba Neon Metin iha hela fatin Aldeia Mota-Ki’ik, suku Hera 01/08.

Antonio rekoñese katak impaktu husi tesi ai, sunu rai mak hanesan foin lalais, akontese inundasaun boot iha loron 4 Abríl 2021, mota sobu uma inklui sasán uma laran, no animal sira.  Komunidade sira halai lori isin lolon, no nein salva buat ruma iha sira nia hela fatin.

“Ha’u hatene katak buka osan husi dalan tesi ai-sunu ne’e iha impaktu bo’ot maibé moris nu’udar agrikultór ne’e susar atu hetan osan, entaun ami tenke tesi-ai hodi fa’an tanba durante ne’e ami moris mak hanesan ne’e, se ami la halo entaun saida mak ami bele halo, aat liu iha situasaun Covid-19 nian laran, entaun hetan osan husi ne’ebé mak hodi haree ba ha’u nia fen no oan sira, tanba ekonomia obriga  se ha’u la halo entaun, tane liman ba sé hodi haree ba ami nia ekonomia uma laran,” tenik Antonio ho onestu ba Neon Metin

Nia dehan se governu bandu komunidade sira liu husi tara bandu, entaun husu ba governu kria dalan seluk ba komunidade sira atu bele buka osan, tanba moris mak hanesan ne’e ona, laiha tan dalan seluk ba komunidade sira ne’ebe moris ho vida agrikultór.

Iha Fatin seluk, Xefe Suku Hera, Antonino M.da Silva hateten iha tinan 2018 autoridade lokal hamutuk ho komunidade sira kria ona programa  Tarabandu, atu bandu populasaun sira labele tesi-ai arbiru maibe nesesidade ema nian obriga, Lei ne’e implementa maibe haree ba nesesidade komunidade sira nian, katak tesi-ai ne’e atu sustenta ba sira nia nesesidade loron-loron, tanba komunidade maioria mak moris ho vida agrikultór.

“Agora iha parte seluk Estadu estabelese tan Estadu Emerjénsia (EE), Serka Sanitaria (SS) no Konfinamentu Obrigatoriu (KO) ne’ebé obriga povu labele halo sirkulasaun ba mai atu fa’an sasán hodi sustenta moris, entaun  hakarak ka lakohi sira tenke tesi-ai tanba sira nia moris mak fa’an ai-maran,” dehan Xefe Suku Hera.

Autoridade ne’e konfesa tan ba Neon Metin katak relasiona ba komunidade sira tesi-ai, nia fo hanoin ona ba komunidade sira katak bele tesi maibé hun ida tenke kuda fali hun lima ho kuidadu, maibé to’o agora seidauk implementa, tanba konsensia husi populasaun sira seidauk iha, ho nune’e husu ba diresaun floresta sira tenke kontrola maka’as ba problema ne’e.

“Ha’u apela ba komunidade sira katak ita hotu moris iha terus no susar nia laran, tanba ne’e bele tesi maibé tesi hun ida kuda fali hun lima, atu nune’e ita bele proteje ita nia rai hodi labele hamosu tan  inundasaun ne’ebé akontese iha loron 4 Abril ne’ebe mak rezulta halakon ema nia vida no estraga sasán barak,” dehan Xefe Suku Hera

Iha Sorin seluk, Diretór Jeral do Ambiente, iha Sekretaria de Estadu do Ambiente (SEA),  João Carlos Soares hateten Diresaun Jeral do Ambiente tutela ba  Sekretáriu do Ambiente, iha Ministériu Koordenadór Asuntu Ekonómiku katak papél boot ne’ebé liga ho deflorestasaun, komunidade sira dependensia ba ai-maran no ai-laran no rekursu ne’ebé iha  hodi hala’o sira nia moris.

Governu liu husi Ministériu Agrikultura no Peska (MAP) no Ministériu Koordenador Asuntu Ekonómiku, liu-liu ba Sekretáriu Estadudo Ambiente iha polítika oinsa atu halo jestaun ba deflorestasaun ho Solo degradasaun ba ai-laran sira ne’ebé mak iha ai laran sira.

“Ita dekretu lei ba floresta, iha mos Diploma Ministerial ho rezolusaun ba Banku Nasionál, depois àreas  protejidas entaun kompinente sira ne’e iha Diresaun  Sekretáriu Estadu do Ambiente, iha dekretu lei baze ambientál no Lei de Biodiversidade, iha parte legal Konstituisaun RDTL artigu 62 aliña F, ne’ebe mak regula kona-ba kestaun ne’e, no mos iha kódigu penal artigu 215 to’o 221 kona-ba klima provido katak bandu komunidade sira sunu rai arbiru,” dehan Joao Carlos ba Neon Metin.

Diretór ne’e esplika tesi ai no sunu rai arbiru ne’e aumenta tan Dióksidu Karbonu (CO2), aumenta degradasaun floresta, aumenta rai manas no rai maran, tasi Sa’e, bailoron naruk, dan la tuir tempu tanba inkonsensia husi komunidade sira, entaun provoka lalais husi reflesaun husi loron matan fó impaktu ba natureza.

“Agora ita nia komunidade sira mai ho  situasaun ne’ebéé mak difisil, iha era miléniu nia laran, entaun prosesu dezenvolvimentu ne’e foin hahú tanba ne’e ita seidauk tarde, maibé ita tenke halo jestaun no komesa oinsa bele muda ema nia pensamentu no konxiénsia katak nia la dependénsia total ba ai-maran maibé dependensia mos  ba to’os hodi bele dezenvolve sira nia moris,” dehan Joao Carlos

Ne’e duni relasiona ho problema hirak ne’e governu tenke kria programa simples ida mak Tarabandu, atu halo sensibilizasaun ho komunidade sira, muda sira nia pensamentu husi dependénsia ba ai-laran no dependénsia ba to’os nune’e bele fó benefísiu ba sira nia moris.

“Ita atu halo mudansa radikál ba sira nia rendimentu ekonomia nian maibé  labele, entaun ita muda neneik pensamentu sira nian, tanba dependénsia hela ba sira rekursu ambiente ne’ebé mak besik sira, entaun sira fa’an ne’e iha benefisiu ba sira nia moris maka ema sosa,  agora ita atu bandu sira maibé difisil tanba ita seidauk iha alternativu atu bele responde ema nia nesesidade loron-loron nian,” tenik Diretór Jerál Ambiente

Iha parte seluk Xefe Departamentu Korpu Guarda Floresta no Estensaun Floresta, João D.M. dos Reis mos esplika katak durante ne’e Guarda Floresta hala’o seguransa ba iha ai laran ne’e difisil tebes,  tanba  problema transporte laiha, no osan atu sosa han hemu iha terenu laiha, no mos ema limitadu tebes  tanba iha Guarda Floresta ne’e hamutuk ema nain 83,  entaun susar atu halo patrullamentu ba problema hirak ne’e.

“Ita haree katak komunidade maioria iha Timor ne’e, sira nia moris depende liu ba iha ai laran. Iha Lei Jerál floresta nian hatete fila fali ba suku ida-idak, tenke asegura sira nia floresta, mais ikus akontese autoridade lokál rasik balun mos bele impede, tanba sira iha interese mos iha laran. To’o oihn loron ami iha Lei oan kona-ba oinsá atu bele asegura  sasán ai laran ne’e seidauk forte,” dehan Diretór João

Nia informa daudaun ne’e Guarda Floresta  hala’o sira nia atividade bazeia ba sira nia esperiénsia no mos ba sira nia kna’ar ne’ebé sira hadomi, iha ambiente nia laran tanba ambiente ne’e importante ba ema hotu nia moris.

Nia dehan durante ne’e Guarda Floresta deteta mak ema tesi ai-sunu no ai-kameli ilegál iha fatin-fatin no mos tiru animal fuik hanesan rusa no manu sira ne’ebé mak moris iha ai laran, sira labele halo kontrola tanba ema limitadu tebes.

“Antes ne’e ami planu hela prepara estatutu kona-ba guarda floresta nian atu bele hamriik iha baze ida ne’ebé mak forte atu bele fó estensaun no prevensaun, iha futuru mai ami sei esforsu atu bele kria Lei oan ida oinsá bele kondena ema sira karik sira laiha lisensa tenke selu,” dehan

Timor-Leste iha ona Polítika Protesaun no Konservasaun Ambiente no Biodiversidade baseia ba Konstituisaun RDTL artigu 61 hateten katak, Meiu Ambiente hanesan unidade hosi fatin buat hotu-hotu ne’ebé maka moris, situasaun moris nian, inklui mos ema ho ninia hahalok ne’ebe maka fo impaktu ba kontinuasaun moris ho prosperidade (kesejahteraan) ema no mos balada sira.

Iha Konstituisaun artigu 6, objetivu estadu nian katak proteje didiak meiu ambiente no bali nafatin riku soin rai ninian, iha artigu 139 katak sustentável ba rekursu Naturais.

Iha kódigu penal RDTL dekretu Lei no. 19/2009, Kodigu penal artigo 215, 217 too 221 bandu atu labele sunu rai, tesi ai, halo kontaminasaun ba ár, bee no rai, poluisaun sonoru (ruido) uza bomba ka materiais kímiku hodi estraga no kaer ikan no peska ikan ilegál.

Importante tebes atu ema hotu iha responsabilidade hodi tau importánsia ba iha bioversidade, nune’e bele hetan nia benefísiu sira atu fornese ai-han, ai-moruk, oksijéniu, mahon, bee, proteje rai labele monu ka halai, material konstrusaun, turizmu, siénsia no absorve poluisaun no loron matan ultraviolet    

Atu bele salva balada no ita hotu husi dezastre naturais mak  ita hotu iha ona konxiénsia, hodi hadomi natureza, nune’e sira mos bele fo mahon ba ita, hodi bele goza moris ne’ebe ses husi risku, no la fo ameasa ba ita hodi hasoru susar iha futuru. Mai ita proteje natureza, ita salva oan sira nia futuru.  

Print Friendly, PDF & Email

LEAVE A REPLY

Please enter your comment!
Please enter your name here