Home Notisia Pagamentu Extraordinariu, FONGTIL: Pratika Abuzu Ba Poder

Pagamentu Extraordinariu, FONGTIL: Pratika Abuzu Ba Poder

648
0
FONGTIL halo konferensia imprensa. [Foto: Adalgisa Pereira | 22.12.2020]

Reportazen Adalgisa Pereira

Organizasaun sosiedade sivíl kontra decreto-lei n.o 63/2020 ne’ebe mak Konsellu Ministru (KM) aprova ona konaba pagamentu extraordináriu salariu adisional fulan ida nian ba administrasaun públika, ne’ebe fo satisfasaun ba Instituisaun Estadu Timor-Leste nian maibe la-iha efeitu pozitivu ba povu kiak sira nia moris.

Liu hosi konferensia imprensa, Diretor Exekutivu FONGTIL, Daniel Santos do Carmo hateten Dekretu Lei N.o 63/2020 ne’ebe Konsellu Ministru aprova no Prezidente Republika, Dr. Francisco Guterres Lu Olo promulga ne’e benifisiu liu ba ema eleitu sira .

“Dekretu lei ne’e signifika katak iha fulan Dezembru, entidade hotu-hotu ne’ebe servisu iha Administrasaun Públika sei simu tan salariu fulan ida nian ka dupla salariu hahu husi salariu USD $ 5.000 mai kraik”, hateten Daniel, iha salaun FONGTIL, 22/12,

Nia hatutan benefisiariu sira iha Dekretu Lei ne’e mak hanesan Prezidente Republika, Prezidente Parlamentu, Vise Prezidente no Membru Parlamentu Nasional, Primeiru Ministru no Membru Governu sira, Prezidente Tribunal Rekursu, Prokurador Jeral, Provedoria Direitus Umanus no Justisa, Komisariu CAC, Ex-titulares no ex-membru sira husi orgaun soberania no funsionario sira hotu (permanente no kontratadu) no nomeasaun polítika sira.

Liu hosi konferensia imprensa FONGTIL husu Prezidente Republika, Primeiru Ministru atu esklarese lei ida ne’e no mos ba CAC, Parlamentu Nasional no PDHJ atu investiga

 “Governu no Prezidente Repúblika hatudu momos pratika abuzu ba poder no privilejiu, hodi hamosu diskriminasaun ba povu sira no FONGTIL mos husu ba Prezidente Republika, Primeiru Ministru atu deklara tanba sa tenke fo salariu adisional ba PM atu elemina tiha dekretu lei no 63/2020 10 de Dezembru”, hateten Daniel

FONGTIL husu mos ba CAC atu halo intervensaun, hodi loke prosesu hasoru governante sira tamba tuir FONGTIL hare katak governante sira pratika abuzu de poder liu husi halo lei, hodi benefisia sira no FONGTIL konsidera hanesan krime.

Ba PDHJ, FONFTIL husu atu uza sira nia kompetensia hodi husu ba Tribunal Rekursu no Parlamentu Nasionl hodi halo fiskalizasaun abstrata ba dekretu lei no 63/2020, tanba dekretu refere viola Konstituisaun RDTL artigu 145 Alinea 2-3.

Tuir FONGTIL katak dekretu lei ida ne’e hatudu momoos katak, ukun na’in sira sempre uza oportunidade hodi atribui sira nia susesu politiku nain sira nia tendensia, hodi rasionaliza tiha benefisiu ba sira nian an, maski nune’e sira hatudu momos katak ne’e abuzu ba poder no privilejiu.

Iha fati hanesan Director Interino Yayasan HAK, Xisto dos Santos hateten dekreitu lei ida ne’e iha razaun rua, ne’ebe  hakarak foti sistematikamente katak orgaun soberanu uza poder politika ne’ebe mak komete ona buat balun, ne’ebe mak kria kondisaun entre ema riku ho ema kiak, iha tempu ida ne’ebe estadu uza politika ida atu rekupera ekonomia nasional, “rekupera ne’e ba se, ba povu ida baibain ka ba povu ida ne’ebe mak iha klase elitu sira”.

“Ami haree katak iha tendensia ema sira ne’ebe mak hanesan asesor sira no ema sira ne’ebe mak iha maun bo’ot sira nia kalilin okos, sira ne’e ho estratejikamente kria kondisaun ida ne’ebe halo povu atu soran malu, sira soran povu ho lider sira tamba ida ne’e mak molok tarde, ami hanoin katak PDHJ a instituisaun ida ne’ebe mak legitimu atu halo fiskalizasaun seluk mos iha tempu imidiata molok natal ka halo ona prosesu ruma ba ema sira ne’ebe mak komete ona krime ida ne’e, ho razaun ida ne’e mak ami hanoin katak se ita husik situasaun ne’e kontinua existe mak sei lori ita ba risku”, dehan Xisto dos Santos.

To’o nutisia ne’e sae, Neon Metin sedauk halo konfirmasaun ho parte governu hodi hetan klarifikasaun.

Print Friendly, PDF & Email

LEAVE A REPLY

Please enter your comment!
Please enter your name here