Reportajen Santina Lucia da Costa
Prezidente Repúblika Dr. Francisco Guterres Lú Olo liuhusi Dekretu Prezidente Repúblika, númeru 80/2021, 27 Setembru, dekreta Estadu fó onras fúnebre no hakoi António João Gomes da Costa ‘Ma’Huno Bulerek Karataiano’ iha semitériu espesiál, iha Jardim dos Herois da Pátria iha Metinaro.
Liuhusi Komunikadu Imprensa ne’ebé Neon Metin asesu katak iha Dekretu Prezidente Repúblika ne’ebé publika ohin, iha Jornál da República hateten Konstituisaun konsagra rekoñesimentu no valorizasaun ba rezisténsia sekulár Povu Maubere kontra dominasaun estranjeira no kontributu ema hotu-hotu ne’ebé luta ba independénsia nasionál.
Lei kona-ba Estatutu Kombatente Libertasaun Nasionál reafirma vontade atu fó omenaje ba esforsu sira ne’ebé manifesta husi Kombatente Libertasaun Nasionál iha luta ba Independénsia Nasionál.
“Haree ba kontribuisaun ba Luta Libertasaun Pátria, Conselho dos Combatentes da Libertação Nacional (CCLN) autoriza António João Gomes da Costa ‘Ma’Huno Bulerek Karataiano’ iha direitu atu hetan onras fúnebre no hakoi iha semitériu espesiál iha “Jardim dos Herois da Pátria” Metinaro, nu’udar Kombatentes Libertasaun Nasionál.” Hateten, Komunikadu Imprensa husi Casa Sivil iha Palásiu Prezidensiál Nicolau Lobato, 27/9.
Ma’Huno nia kontribuisaun iha luta libertasaun patria, nu’udar Fundadór ASDT, membru Comite Central Fretilin, Chefe Conselho Político Militár Frente Armada, Secretário da Comissão Diretiva da Fretilin, Comandante das FALINTIL, Secretario Região 3, líder ida ne’ebé inspira no besik tebes ba foin-sa’e klandestinu sira iha vila laran, iha Timor-Leste no iha Indonézia.
Ma’Huno Bulerek Karataiano moris iha 14 Abril 1949 no hakotu nia iis iha 24 Setembru 2021 iha Hospital Nasionál Guido Valadares (HNGV) tanba moras stroke.
