Reportajen David da Costa Gusmao
Espoza Prezidente Republika Demokratika Timor-Leste, Cidália Nobre Guterres husu ba Ministériu Saúde (MS) hodi prepara fasilidade Mamografia nune’e inan feton ne’ebé iha moras kankru susun bele ba halo konsulta.
Espoza Prezidente Repúblika, Sidalia Nobre hatete presiza halo sosializasaun makaas liu konaba moras kankru iha Munisípiu no mós iha Díli.
“Presiza halo sosializasaun makas liu tanba moras ne’e antes atu halo prevensaun ita nain rasik mak hakbesik an ba iha fasilidade, hodi hato’o ita ninia situasaun atu halo konsulta, para ita nia mediku espesialiata sira haree oinsa atu halo atendimentu,” dehan Sidalia bainhira partesipa iha sosializasaun moras Kankru iha Rede Feto, Kaikoli, 28/09.
Nia informa kuandu sira rasik la besik ba fatin saúde ninian, moras ne’e iha deit sira nia isin, no presiza iha apoiu barak mak hanesan halo sosializasaun, apoiu familia nian importante tebes, fasilidade saúde nian liu-liu mamografia ne’e importante tebes.
“Husu ba governu liu husi Ministeriu Saúde (Ms) hamutuk ho ospitais sira, haree fasilidade sira ne’ebé mak importante kona ba kankru susun, tanba ne’e mós tama iha prioridade, tanba kankru susun ne’e hamate inan sira, ho mamografia iha, ita nia inan feton no alin feton sira bele hakat ba iha sentru saúde ninian liu-liu ospitais sira”, dehan espoza Prezidente Repúblika.
Nia haktuir halo prevensaun diak liu do que kura, tanba kura ne’e dala ruma iha situasaun defisil mosu atu hakat ba la ba entaun moras ne’e iha isin ne’e avansa nafatin.
“Ami mós iha fundus ba inan feton sira kuandu hetan moras kankru, nia hakat ba ospital, maibe fasilidade seidauk kompletu entaun doutór sira sei hasai nia sample hodi haruka ba iha klinika Cindranita pois mak haruka ba iha Indonezia, depois husi ne’eba mak haruka fali rezultadu mai doutór, sira bele halo asaun ou opera oinsá atu haruka sai ba rai liur”, informa Cidalia.
Nune’e nia hatoo katak inan feton ne’ebé mak presiza apoiu, gabinete nia odamatan nakloke hela hodi hetan apoiu.
Espoz Prezidente Republika hatoo lia menon ba inan feton sira, sekarik iha moras kankru susun keta moe atu koalia sai, no feto klosan sira buka dalan hodi sentru saúde atu hetan tratamentu
