Reportajen David da Costa Gusmao
Ministeriu Edukasaun Juventude no Desportu (MEJD), husu ba mestre/a, inan ho aman sira atu la impede labarik sira tuir vasina Covid-19, tanba ne’e responsavel Mestre, inan ho aman atu haree labarik nune’e sira mós bele hetan vasina, atu bele proteje-an husi virus.
“Mestre, inan ho aman sira mai ita hotu apoiu ba iha programa kampaña imunizasaun ida, tanba labarik sira sei kiik, presiza konsentimentu husi inan aman. Hau espera katak inan aman sira sei bele kontribui, tanba ita hotu-hotu tenke tau matan ba saúde vida ita nia oan sira,” dehan MEJD Armindo Maia, iha Eskola 30 Agusto Comoro, Kuarta 26/10.
Tanba ne’e MEJD husu ba Mestre, inan ho aman sira, favor labele impede fali, “imi nia oan sira, atu tuir vasina favor ne’e responsabilidade ita hotu-hotu nian, ita hanesan mestre, inan ho aman ita presiza tulun sira atu nune’e sira mós bele hetan saude ne’ebé di’ak, atu nune’e bele proteje sira husi virus. Hau nia apelu mak ne’e ita hotu fó liman ba malu atu bele apoiu programa ne’e”.
Iha fatin habesan Ministeriu Saude, Odete Maria Freitas Belo informa vasina ne’ebé fó ba labarik sira atu simu ne’e mós iha dozes rua, hafoin simu doze dahuluk, hein semana tolu mak simu fali doze da-ruak nian. Vasina ne’e sei fó 0,3 mil kada dozes, vasina hanesan ho vasina AstraZeneca ho Sinovac maibé fatin sona mak hanesan hotu iha kabas.
“Vasina ne’ebe ita atu fó ba ita nia oan sira ne’e nia efikásia diak 95% bele proteje husi covid-19, liu-liu ba moras sira ne’ebé mak asintómatiku, ba idade 16 ba leten no efikásia 100% ba labarik sira ho idade 12 to’o 15,” dehan Ministra Saude
Iha parte seluk Ernesto Gusmão nu’udar aman estudante, kontente tebes governu nia planu, hodi fó vasina ba labarik sira, tanba ho vasinasaun ida ne’e, bele proteje labarik sira husi virus Covid-19. Tinan ida labarik sira la eskola, maibe ho vasina ida ne’e labarik sira bele hahú fali sira nia eskola hanesan baibain.
“Hau nu’udar aman, hau tenke enkoraja hau nia oan sira para vasina, tanba vasina ne’e aumenta ita nia oan sora nia imunidade. Hau kontente tanba hau nia oan mós vasina ona,” nia espresa.
Estudante Lusina Boavida sente kontente tebes tanba bele simu ona vasina Pfizer atu bele asegura-an husi virus Covid-19 no mós atu bele aumenta imunidade.
“Hau simu vasina diak hela. Hau hakarak enkoraja ba maluk sira hotu labele tauk simu vasina, tanba vasina ne’e diak atu proteje ita nia saude husi Covid-19,” nia dehan.
