Reportajen Silvino Freitas
Tuir survey ne’ebe mak halo husi Sekretáriu Estadu Komunikasaun Sosiál (SEKOMS) ba media imprime, populasaun iha territóriu nasioná,l maioria sei asesu jornál diáriu nasionál ho 39%.
“Jornal ema asesu barak liu mak diariu-nasional ho 39%, tuir mai mak Timor Post 34% depois mak STL 8%, Independente 7%, Business-Timor 4%” dehan Sekretariu Estadu, Merisio Akara iha ambitu Dili Dialogue Forum iha salaun Delta Nova, (2/11).
Nia informa survey ne’e hatudu mai ita katak ema asesu ba media sira tanba deit polítika nasionál, Timor gosta liu mak akompaña asuntu polítika iha media.
“Ema asesu GMN barak liu tanba asuntu politika, iha Grande entrevista debate polítika, tanba nee mak ema asesu GMN barak liu no gosta liu asuntu polítika” nia informa.
Nune’e nia husu ba media konvensionál atu labele laran taridu ba survey ne’ebe mak iha, maski media dijitál hahú avansa makaas maibé seidauk halakon media konvensionál.
emtretantu tuir Diretora Timor-Post, Suzana Cardoso hateten maski iha survey husi SEKOMS fó sai katak Timor-Post iha nivel segundu maibé Timor-Post nafatin númeru primeiru.
“Survey ne’ebe mak fo sai ohin dadeer hatudu katak diáriu nasionál mak nivel primeiru, maibé ba ha’u hateten katak Timor-Post nafatin number-one, tanba ami domina iha publisidade” dehan Suzana iha iha ambitu Dili Dialogue Forum iha salaun Delta-Nova, ne’ebe organiza husi Konsellu Imprensa.
Nia konkliu ema asesu jornál ne’e laos deit iha informasaun, maibé liu husi publisidade nee evidénsia hatudu katak sei hetan konfiansa husi povu Timor-Leste.