Reportajen Adroaldo ‘Saretukau’
Komunidade aldeia haat iha suku Vatuvou, Postu Maubara, Munisípiu Liquisa iha parte foho hasoru problema estrada ho kondisaun at, nune difikulta komunidade sira labele asesu ba merkadu iha Postu Maubara vila, no Munisípiu Liquisa hodi fa’an sira nia produtu iha tempu udan.
Lider komunitáriu suku Vatuvou, Gabriela da Costa Perreira Jerónimo hato’o ba Neon Metin katak, problema ne’ebé ninia suku hasoru, liu-liu iha nia aldeia haat iha parte foho nian iha difikuldade ba estrada tanba komunidade sira mak tá rasik estrada hodi asesu iha tempu bai-loron.
“Estrada ida sira uza ne’e, estrada ida sira tá rasik ne’e, estrada tama duni sira nia aldeia maibé sira tá rasik, hanesan governu atu hadi’a ne’e seidauk. Proposta ami halo hatama ona, halo diskusaun iha suku ba to’o postu no iha muníspiu mos pasa, maibé ni-nia implementasaun ne’e seidauk”, Gabriela hato’o ba Neon Metin iha Postu Maubara.
Nia hatete “Kareta tama so tempu bai-loro, udan ne’e kareta labele ba, bai-loron kareta bele asesu hotu”, nia hatutan foin da-dauk Ministru Defeza ba halo sosializasaun koanbá COVID-19 ba to’o iha área aldeia haat refere, nia fiar katak Ministru mos haree kondisaun ida ne’e, lider komunitáriu ne’e akresenta maibé to’o tempu udan, ida ne’e difikulta ona transporte públiku ne’ebé viajen ba mai iha área refere hodi transporta komunidade ho sira nia produtu ba merkadu iha Postu Maubara no Likisa.
Nia hato’o katak ni-nia komundade sira moris nu’udar vida agrikultor hodi fa’an sira nia produtu agríkola ne’ebé sira kuda nomos animal ne’ebé komunidade sira hakiak, nia hatete iha aldeia balu moris ho Vanila pois mak sira fa’an, kafé, iha mos produtu lokal hanesan nuu, hudi no seluk tan, populasaun balu moris ho hakiak animal hanesan karau, fahi, manu ho sira seluk.
“Sira mai fa’an ne’e iha merkadu Vila Maubara ho merkadu Likisa, mais mak ne’e, tanba dook, dalan la iha asesu ba transporte públiku sira atu sa’e ba, entaun sira dala ruma lori mos ida rua, ita ema ida labele lori buat barak, se fahi entaun ema na’in tolu, haat leba lisuk ida mak mai fa’an, hanesan manu, sira bele lori to’o sanulu resin hodi mai fa’an, mais tempu bai-loro di’ak, kareta iha asesu, maibé udan ne’e labele”, hatete lider komunitáriu suku Vatuvou ne’e.