Reportajen Santina Lucia da Costa
Ministériu Asuntu Parlamentár no Komunikasaun Sosiál (MAPKOMS) halo sorumutu ho media na’in sira, ho objetivu ba kooperasaun serbisu ba publikasaun informasaun ba tinan oin nian, dialogu ne’e hala’o iha salaun sentru Nasionál Empregu Formasaun Profisionál (CNEFP), Tibar.
Hafoin dialogu, Ministru Asuntu Parlamentar no Komuniasaun Sosial (MAPKOMS), Francisco Martins da Costa Pereira Jeronimo, hateten dialogu ne’ebé halo ho media na’in sira, mak atu partilla informasaun ba malu, buka solusaun oinsa haree ba tinan oin mai, buat ne’ebé mak ita presija hadia ne’e hadia, no buat ne’ebé mak di’ak ona ita kontinua.
“MAPKOMS nia haree ba divulgasaun informasaun ne’e komesa di’ak, buat ne’ebé mak falla fó hatene malu, hau sempre komunikasaun ho media na’in sira.” dehan, MAPKOMS, Francisco Martins da Costa Pereira Jeronimo, iha salaun CNEFP-Tibar, 29/12.
Governante ne’e husu ba media na’in sira katak, iha difikuldade ita hamutuk nafatin fó solusaun, labele hamate sira nia media maibé kontinua, governu sei atentu atu buka solusaun halo nusa mak dalan di’ak liu atu media sira bele sustentavél.
Iha Fatin hanesan, Media na’in Lafaek News, Acacio Pinto hateten diálogu ida ne’e importante tanba bele rona direita hosi media na’in sira no media na’in sira mós rona direita opiniaun polítika governu MAPKOMS ho SEKOMS ninian, oinsa atu bele ligasaun ba malu.
“Ohin aprezentasaun ne’ebé maka MAPKOMS ho SEKOMS halo, sira dalabarak serbisu hamutuk ho Radio komunidade sira oinsa mak bele liga radio komunidade mai nasional, hosi nasional oinsa liga ho komunidade ho informasaun sira ne’ebé mak bele to’o iha baze.” dehanAcacio Pinto.
Acacio hatutan, importante oinsa mak ba oin governu nia polítika oinsa halo kooperasaun di’ak ho media sira oinsa fó apoiu, liuliu publisidade sira, tenki fó pursentu hanesan ba media sira
Nia akresenta, espera katak tinan oin governu tenki konsiderasaun ba opiniaun media na’in sira, atu nune’e ita hotu-hotu dezenvolve ita nia rai ida ne’e ho informasaun ida ne’ebé mak labele ba fali kotuk, mais ho era-teknolojia ne’ebé mak iha ne’e, ita avansa hatudu ba nasaun seluk katak, Timor-Leste mós adapta-an ho mundu teknolojia.
Partisipa iha dialogo ne’e mak hanesan, Media na’in sira hosi, Independente, Neon Metin, Lafaek News, STL, Tatoli,ip, RTTL,ep, Radio Rakambia, no Asosiasaun Jornalista Timor-Leste (AJTL), Timor-Leste Press Union (TLPU), União Profisaun Jornalista Timor-Leste (UPJTL) no seluk tan.
