Reportajen Santina Lucia da Costa
Sekretáriu Jerál partidu Frente Revolusionáriu Timor-Leste no Independente (FRETILIN), Dr. Marí Alkatiri sente triste tanba kandidatura Prezidente Repúblika 2022-2027 balun, ne’ebé partidu balun apoiu hakarak hamosu fali krize.
“Hau triste mós bainhira kandidatu ida FRETILIN apoiu, ho intensaun ida ké di’ak, mais kandidatu seluk mai ho intensaun la’os atu hakotu krize maibé atu kria krize.” hateten,Sekretariu Jeral FRETILIN, Marí Alkatiri iha konferensia Imprensa hafoin fila husi Portugal, Kinta-Feira, 27/1.
Marí Alkatiri dehan sidadaun hotu iha direitu kandidata-an, maibé tenki iha intensaun kontribui kria paz no estabilidade, la’os kandidata-an ba Prezidente Repúblika para atu hahú fali Krize foun.
“Ne’e mak halo hau nia laran taridu, ita labele kandidata-an dehan kedas atu kria krize, ita atu sai Prezidente Republika, di’ak tebes, direitu hotu-hotu nian, mais la’os para atu hahú fali krize foun, atu sai husi krize.” Tenik Marí Alkatiri.
Nia hatutan bainhira kandidata-an komesa dehan fali katak, orgaun soberania estadu halo desizaun sala la imparsiál ne’e ita kontra ona funsionamentu norma do estadu, no direitu demokrátiku, vida institusionál, kultura institusionál ita labele hakarak konsolida buat ida bainhira ita atu sobu.