Reportajen Efrem Colo
Prezidente Repúblika (PR), Dr. Francisco Guterres “Lu-Olo” ohin ofisiálmente fo tomada de pose ba Calisto Santos Coli (Coliati) nu’udar Vice-Xefe Estadu-Maiór Jenerál Forsas Armadas, no Komodoru Donaciano do Rosário da Costa Gomes (Pedro Klamar Fuik), asume knaar ba Xefe Estadu-Maiór Forsas Armadas.
Liuhusi seremonia tomada de posse ne’e Prezidente Republika hateten iha loron 2 fulan ida-ne’e, Tenente-Jenerál Falur Rate Laek foti knaar aas liu iha ierarkia militár nu’udar Xefe Estadu-Maiór Jenerál Forsas Armadas, hodi troka Tenente-Jenerál Lere Anan Timur.
Prosesu hirak-ne’e la’o hanesan baibain, ho di’ak no hakmatek, tuir dalan tradisaun militár nian. Ohin kompete ba Prezidente Repúblika no Komandante Supremu Forsas Armadas atu lori ba oin prosesu renovasaun ba lideransa militár, hodi evita mosu deskontinuidade ka inserteza hirak ne’ebé ladún fó benefísiu ba ita-nia rain no, ho nune’e, hametin Forsas Armadas nia koezaun no estabilidade.
Prezidente Republika hatutan iha serimónia simples maibé signifikativu ida-ne’e, ho liafuan felisitasaun no insentivu ba señór Majór-Jenerál Calisto Santos Coli (Coliati) no señór Komodoru Donaciano do Rosário da Costa Gomes (Pedro Klamar Fuik), ne’ebé mak ohin toma pose ba knaar aas nu’udar Vise-Xefe Estadu-Maiór Jenerál Forsas Armadas no Xefe Estadu-Maiór Forsas Armadas.
Nune’e nia akresenta fiar Vise-Xefe Estadu-Maiór Jenerál Forsas Armadas no Komodoru Donaciano do Rosário da Costa Gomes (Pedro Klamar Fuik) iha kapasidade intelektual hodi kaer knaar no misaun ne’ebé nia simu.
” Señór Majór-Jenerál Calisto Santos Coli (Coliati), Ohin Señór Jenerál simu pose nu’udar Vise-Xefe Estadu-Maiór Jenerál Forsas Armadas hodi foti knaar daruak aas liu iha ierarkia militár. Ho nune’e, Señór Jenerál sai hanesan kolaboradór diretu mahuluk ba Xefe Estadu-Maiór Jenerál Forsas Armadas, hodi fó akonsellamentu militár ba nia. Ita hotu hatene ninia kualidade sira ho ninia determinasaun hodi kaer metin misaun sira-ne’ebé mak fó ba nia atu hala’o. Tanba ne’e mak ami fiar katak Señór Jenerál iha kapasidade di’ak tebes atu kaer knaar aas nu’udar Vise-Xefe Forsas Armadas.” Dehan Lu Olo iha palacio prezidensia, 15/02.
Nia salieta liu tan ba Señór Komodoru Donaciano do Rosário da Costa Gomes (Pedro Klamar Fuik),Ha’u hatene katak Ita-Boot ofisiál ida ne’ebé naran di’ak, ho kualidade intelektuál no profisionál aas tebetebes hodi kaer knaar iha diresaun Estadu-Maiór Koordenadór Konjuntu no, hamutuk ho Vise-XEMJFA, fó akonselhamentu ba Xefe Estadu-Maiór Jenerál Forsas Armadas durante hala’o ninia knaar.
Iha fatin hanesan Vise-Xefe Estadu-Maiór Jenerál Forsas Armadas, Majór-Jenerál Calisto Santos Coli (Coliati) informa tan iha instituisaun sempre iha planu hein de’it atu implementa.
“Iha instituisaun hot-hotu iha programa alende instituisaun militár bainhira tama ba tinan ida sempre iha planu, ne’ebé militar iha tiha ona planu atu hala’o iha tinan ida ninian tanba ne’e planu iha ona hein de’it atu hala’o, Sem duvida ho jerasaun foun, ho ran foun sei buka integra iha realidade atual ne’ebé ita-nia nasaun involve no mós iha evolusaun mundu nian, liuliu iha rejiaun ne’ebé Timor-Leste insera ba”, hatete Nia.
Alende ne’e, Xefe Estadu-Maiór Forsas Armadas (F-FDTL), Komodoru Donaciano do Rosário da Costa Gomes (Pedro Klamar Fuik) hatutan, naturalmente hanesan Estadu Maiór Forsas Armadas sei iha de’it programa saida mak iha estabelesidu ona no saida mak presiza planea, saida mak presiza hadia ou reforma apartir ohin indianti mak foin bele komesa servisu