Reportajen David da Costa Gusmao
Komisaun Nasionál Elisaun (CNE) ohin lansa ona inisiu imprimisaun boletín votu ba elisaun prezidensial periodu 2022-2027 no boletín sira ne’e sei print tuir númeru eleitór.
Prezidente Komisaun Nasionál Elisoens (CNE), José Belo informa lei precensiál artigo 38 koalia katak proposta ne’ebé maka kada kandidatu hatama sira nia fotografia, símbolu no tamañu sira ne’e, hatama proposta liuhosi STAE, no sei hatama proposta mai fali iha CNE, depois CNE lori ba halo imprimisaun ba boletín votu.
“Ami aprecisa no aprova liu-liu konaba material sira iha boletín votu. Agora daudaun ami ba ona iha gráfika nasionál para komesa ona imprime ba boletín de votu, no ita komesa print ona to’o iha 11 Marsu,” dehan Prezidente CNE José Belo ba jornalista sira iha salaun Laline Larigutu CNE Dili, Sexta 25/02.
Nia haktuir boletín votu ne’ebé atu print, ne’e kandidatura husi kandidatu Prezidente da Republika hotu aseita, no sira asina hotu tiha ona, ne’ebé nia modelu ikus iha ona, ho ida ne’e Komisaun Nasionál Elisaun (CNE) foti desizaun ba ida ne’e.
“Tanba sira aseita hotu ona, ne’ebe ita ona no sira nia asina nia modelu, laiha tan ema ida protesta ona, hotu-hotu dehan ida ne’e mak diak liu ona, no ita hola desizau ba ida ne’e hodi ba halo imprime,” dehan nia.
Nune’e mós husu ba iha parte hotu-hotu, liuliu reprezentante kandidatu sira no ba hotu-hotu akompaña boletin votu ne’e, no mós ba seguransa hotu atu bele akompaña hodi asegura ba boletin votu ne’ebe atu imprime ne’e.
“Boletin de votus ne’e ita sei print depende ba iha numeru eleitor ne’ebé maka iha, no hatene katak númeru leitór hamutuk iha 860 mill, entaun ita halo tuir ida ne’e depois iha 10% kada sentru votasaun, ita sei haree hela para atu bele to’o nafatin,” nia esplika