Reportajen Adroaldo ‘Saretukau’
Klibur Profisionál Saúde hosi Partidu KHUNTO, deklara fo apoiu ho sira nia votus konfiansa ba kandidatu ho númeru sorteiu 9, Armanda Berta dos Santos iha eleisaun Prezidensiál períodu 2022-2027, tanba nu’udar feto poténsia ida ne’ebé kontribui ba nasaun ida ne’e ho esperiénsia servisu ne’ebé durante ne’e nia halo ona nu’udar membru governu.
Konferénsia imprensa ne’ebé hala’o iha sede sekretariadu kandidatu Armanda Berta dos Santos, Salaun Esperansa, Fomentu ne’e, porta vóz Celina da Costa Exposto hatete fo konfiansa ba kandidatu Armanda Berta tanba nu’udar feto ida brani hodi liberta povu doben ida ho esperiénsia servisu ne’ebé mak nia kontribui ona, Armanda Berta mos hanesan feto klandestina ida liu hosi nia envolvimentu iha organizasaun rejiténsia juvenil FITUN.
“Durante asumi knaar hanesan Vise Primera Ministra ne’ebe haree liu ba iha seitores Saúde, Edukasaun no Sociais. Ami hare laiha dúvida ho nia kapasidade atu rezolve no buka solusaun problemas sira ne‘ebé iha, hamutuk ho Ministériu da Saúde, Ministériu da Edukasaun no Ministériu Solidade Sosial, liu-liu haree ba iha moras pandemia COVID-19 no agora da-dauk hasoru hela moras Dengue hanesan moras endémika Timor Leste nian,” hateten Porta vóz Celina.
Nia hatutan alein de esperiénsia sira ne’e hotu Armanda Berta dos Santos hanesan mos lideransa feto ida ne’ebe Hakribi korupsaun, nepotizmu ne‘ebé estraga nasaun, hodi hatudu realidade lori nia ema sira mak kaer nu’udar membru governu ba juramentu iha Ramelau. Nia dehan, atuál Prezidente partidu KHUNTO ne’e, hanesan mos feto ida ne‘ebe hakribi violénsia doméstika ne’ebé estraga família hanesan Ai’rin nasaun nian, no estraga labarik hanesan futuru nasaun nian.
Nia akresenta, Armanda Berta mak feto ida ne’ebé pasénsia, haraik aan, ukun ho domin ne’ebé hatene hadomi nasaun, tanba ne’e Klibur profisional saúde hosi partidu KHUNTO nian afirma sira nia pozisaun ba sira nia kandidatu hodi kompete iha eleisaun Prezidensiál ne’ebé sei hala’o iha loron 19 Marsu tinan ne’e.