Reportajen Santina Lucia da Costa
Manatuto oan ne’ebé kompostu husi veteranu, grupu organizasaun partidu politiku, juventude, organizasaun arte marsiál no rituál, hamutuk ho populasaun deklara prontu fó apoiu votu ikus lider jerasaun Manatutu oan Premiadu Nobel da Paz, Dr. José Ramos Horta ho númeru sorteiu 14, hodi avansa ba Prezidente Repúblika períodu 2022-2027 no Lider Instóriku nomos Komandante Ex-Xefe das FALINTIL, Kay Rala Xanana Gusmão ba Palasiu Governu.
“Ami halibur malu mai hosi kamada intelektuál no la mai hanesan grupu organizasaun partidu politikus no mai hanesan Manatutu oan hodi hamariik hamutuk no lori Maun Boot José Ramos Horta ba iha Aitarak-Laran hodi sai Prezidente Repúblika ba povu tomak no apoia fali maun boot Xanana sai primeiru ministru,” afirma, Portavós Manatutu, Boaventura Soares “TOCHA” Konferensia Imprensa iha salaun enkontru Juventude Manatutu-Vila, 26/02.
Dadaun ne’e intelektuais Manatutu oan sira komesa dor to dor ba uma komunidade hodi konvese povu atu vota ba númeru 14 iha eleisaun presidensiál loron 19 Marsu 2021.
“Ami agora komesa dor to dor hodi fó fiar ba povu hili no vota ba númeru 14 Maun Boot José Ramos Horta,” nia alerta.
Portavós Boaventura apela mós ba grupu juventude arte marsiál no arte rituál Manatutu oan sira atu fó liman ba malu koopera ho Polisia Nasionál Timor-Leste (PNTL), Komandu FALINTIL Forsa Defeza Timor-Leste (F-DTL) no autoridade lokál sira hodi kria nafatin paz no dame iha ida-idak nia hela fatin hodi fó susesu ba eleisaun la’o ho transparansia.
Iha fatin hanesan, Reprezentante Juventude Manatutu oan, Saturnino Pires dehan, Timor-Leste nu’udar nasaun soberania tenki hala’o eleisaun ho demokratiku, hodi povu bele ezerse sira nia votu no hili lider ida ne’ebé sai duni presizente ba povu tomak no labele sai fali prezente ba grupu partidu ida nia interese hodi halo povu sofre no terus bebeik.
“Timor-Leste tenki moris hodi goza demokrasia ho Liberdade ho livre, tanba independensia la’ós fin ka ikus ba ita nia luta ida ne’e, maibé restaurasaun ba ukun rasik aan hanesan inisiu ita nia luta hodi hasoru nakukun ne’ebé satan netik iha tempu Liberdade no ukun rasik aan. Nakukun ne’ebé satan netik iha ita nia ukun rasik aan no Liberdade maka kolonializmu foun ne’ebé satan netik no hanehan povu Timor-Leste iha aspeitu oin-oin. Ho razaun hirak iha leten, ami hosi povu Manatutu anan ne’ebé hamriik hamutuk la mai ho kor partidu politiku ruma, inklui juventude Manatutu anan sei fó votus ba ita nia maun boot José Ramos Horta ba Prezidente Repúblika periodu 2022-2027.” Hateten, Saturnino Pires.
Nia dehan, Objetivu hosi ukun rasik aan maka oinsá povu bele moris di’ak iha liberdade, paz, estabilidade no iha seguransa ne’ebé di’ak no ema hotu- hotu bele asesu ba edukasaun, saúde ho kondisaun ekonomia ne’ebé baratu hodi povu ba moris di’ak sai hosi mukit no kiak.
“Ho buat hirak ne’e maka ami Manatutu anan hosi Tasi Feto, Tasi Mane hamutuk ho povu Postu Administrativu fatin neen (Laklubar, Manatutu-Vila, Barique, Soibada, Laleia no Laklo) hamariik firme no hanoin ida de’it no ho laran ida de’it hakarak fó votu ba Maun Boot, José Ramos Horta iha periodu eleisaun ida ne’e.” nia informa.