Reportajen Adroaldo ‘Saretukau’
Grupu English Conversation Course (ECC) organiza kompetisaun nasional Spelling Bee daruak (Kompetisaun Soe Letra) entre estudante sekundáriu 60 hosi ensinu sekundáriu públiku no privada 14, kompostu hosi eskola 10 iha Díli no haat seluk hosi Baucau, Liquiça, Ermera no Aileu, hodi hasa’e estudante sira nia koñesimentu ba vokabuláriu lian Inglés, treian sira nia mentalidade no halo estudante sira koñese malu di’ak liu tan.
Iha grand final ba kompetisaun Spelling Bee ne’ebé hala’o iha Auditorium universidade UNITAL, 12 Marsu ne’e, Prezidente Komisaun Organizadora ba kompetisaun, Jachson Sandro Binsasi hatete, objetivu fundamental hosi kompetisaun ne’e atu treinu estudante sira nia aan no mentalidade atu hamriik iha ema barak nia oin hodi espresa sira nia hanoin, koñesimentu no matenek ne’ebé durante ne’e sira aprende hodi kompete ho estudante sira seluk.
Iha parte seluk atu harii estudante sira nia relasaun amizade entre eskola ida ho eskola sira seluk, liu-liu eskola iha Díli no munisípiu sira, oinsá sira kria ambiente ida hodi suporta no ajuda malu iha prosesu aprendizajen, la’os de’it iha lian Inglés maibé iha esperiénsia seluk ne’ebé sira bele fahe ba malu entre sira.
“Spelling Bee ita haree kompetisaun ida ne’ebé mak inspira estudante sira atu aprende lia-fuan ka vokabuláriu iha Inglés, tanba iha spelling bee sira sei hasoru lia-fuan iha Inglés barak ne’ebé mak sira nunka rona, lee hetan no nunka hasoru iha sira nia komunikasaun diária, tantu aprende Inglés iha eskola ou aprende Inglés iha fatin seluk. Entaun ida ne’e fo oportunidade ba estudante sira atu hakle’an sira nia koñesimentu liu-liu ba iha vokabuláriu sira iha Inglés. No la’os de’it aprende vokabuláriu maibé tulun mos estudante sira atu oinsá pronúnsia ka lee lia-fuan ne’e ho loloos, standard Inglés nian duni. No oinsá mak sira mos bele treinu sira nia aan atu spell ka soe letra ba lia-fuan sira ne’ebé mak foun,” dehan Jachson iha enseramentu grand final kompetisaun Spelling Bee, 12/03.
Jachson akresenta, liu hosi kompetisaun ida ne’e mak atu prepara liu tan estudante sekundáriu sira nia abilidade ne’ebé di’ak liu. Ajuda mos estudante sira hakat sai hosi sira nia bareira ne’ebé satan sira, “balu dala ruma susar atu ko’alia, moe no difisil espresa sira nia hanoin, sira nia matenek, maibé liu hosi ida ne’e hanesan faze preparasaun ida atu treinu sira, atu bele prepara sira nia aan di’ak iha nível universitáriu no bele estuda maka’as liu tan hodi prepara ba sira nia susesu iha futuru iha vida pesoal, vida akademia nomos vida profisional,” tenik Jachson.
Nia hato’o mos mensajen ba estudante sira ne’ebé tuir ona kompetisaun no sira ne’ebé seidauk partisipa atu labele ta’uk sai hosi sira nia zona konfortável. “Bainhira imi deside dezafia imi nia aan tuir kompetisaun sira ne’e, sei tulun imi atu dezenvolve imi nia aan liu-liu aprende língua Inglés ne’ebé mak importante mai ita atu susesu iha futuru aban bairua nomos bele hetan oportunidade seluk hanesan bolseiru nomos servisu,” Jachson enkoraja.
Iha parte sorin kontestante hosi Koléjiu Paulo VI, Marcelina Verónica Repi ne’ebé hetan primeiru lugar ba kompetisaun Spelling Bee ne’e, espresa nia sentimentu haksolok maibé nia hato’o katak nia sente ta’uk oi-tuan wainhira tuir kompetisaun ne’e tanba iha lia-fuan 1000 ne’ebé sira sei spell (soe letra) aumenta tan preokupasaun eskola halo nia la fiar aan, maibé nia haksolok tanba nia konsege to’o duni final.
“Hosi kompetisaun ne’e ha’u aprende tenki pasénsia, lee barak no tenki fiar aan. Buat ida fiar aan ne’e importante tanba la’os fiar ida aat maibé fiar dehan ha’u bele, durante iha prosesu ne’e tenki akompaña mos ho reza,” Marcelina expresa nia sentimentu ba klasifikasaun Primeiru ne’ebé nia hetan.
Nia mos enkoraja nia belun sira seluk katak tuir kompetisaun ne’e labele rende iha dalan klaran, no iha fiar aan katak ha’u bele, tanba buat hotu-hotu posível.
Nune’e mos estudante Regina Cunha hosi eskola São José Operário espresa nia sentimentu kontente no orgullu tanba bele tuir kompetisaun ne’e maske nia elimina iha primeira ronda, maibé liu hosi kompetisaun ne’e nia bele aprende oinsá ko’alia iha ema barak nia oin ho mentalidade ne’ebé di’ak. Nia mos enkoraja ba estudante sira ne’ebé atu tuir spelling bee tuir mai tenki estuda, lee barak no prepara mentalidade di’ak.
Iha sorin seluk juri ba kompetisaun Spelling Bee ne’e, hanesan mos tutor ba grupu ECC, Geordie Fung hosi Embaixada Amerika sente orgullu hodi sai juri ba kompetisaun nasional Spelling Bee ba estudante sekundáriu ne’ebé organiza hosi grupu ECC.
“Ha’u hanoin katak estudante sira tinan ne’e kapas los, matenek barak no ha’u sente katak sira uza lia-fuan Inglés no komprende spelling ka soe letra di’ak liu ha’u, wainhira ha’u moris iha Austrália no hahú aprende lian Inglés,” Geordie hatete.
Kompetisaun Nasional daruak ba Spelling Bee ne’e organiza hosi ECC ne’ebé hetan suporta hosi Uma Amérika at UNTL. Antes ne’e ECC organiza uluk ona kompetisaun Nasional dahuluk ba Spelling Bee iha tinan kotuk.