Reportajen Santina Lucia da Costa
Kampaña ba dala-sia (9) kandidatu Prezidente Republika, Nú. sorteiu 12, Virgilio da Silva Guterres “Lamuka,” husu povu Ainaro iha eleisaun Prezidente Republika hili ema ne’ebé hatene ukun, sai Prezidente Republika tenki ibun badaen iha Kapasidade sai matan, tilun ibun ba povu.
Iha ambito kampaña ho tipu dialogu, Kandidatu Prezidente Republika, Virgilio da Silva Guterres “Lamukan”, hateten, bainhira iha eleisaun Prezidente Republika tenki hili ema ne’ebé iha kapasidade atu ukun povu no Prezidente Republika labele koalia liafuan kroat, liafuan tenki hakuak malu.
“Fó hatene ba povu Ainaro, eleitór Ainaro sira atu hili ema ne’ebé ké hatene ukun sai Prezidente Republika iha kapasidade, sai matan povu nian atu haree realidade povu nian haree sosial, Prezidente Republika tenke sai povu nia tilun atu rona povu ninia halerik rona povu nia lamentasaun, ita hili Prezidente Republika la’os hili imi ema hanesan bibi diuk, no hili Prezidente Republika hatene koalia, la’os koalia de’it mais koalia di’ak, Prezidente labele liafuan kroat, liafuan ne’e tenki hakuak malu.” informa, Kandidatu PR, Virgilio da Silva Guterres “Lamukan”, iha Aitas, Postu administrativu Ainaro Villa, Munisipiu Ainaro, Kinta, 10/3.
Kandidatu PR, Nú. Sorteiu 12, dehan, Eleisaun ida ne’e ita hili tuir ita nia konsiensia, hili ema ne’ebé ita hatene, ita fiar katak nia reprezenta anspirasaun politika, iha eleisaun hili la’os matenek maibé ema ne’ebé hatene kaer ukun, matenek ne’e relatif balun iha s2 no s3 mós lahatene buat ida, mais buat importante mak hatene ukun.
Lamukan, hatutan, Rai Ainaro sai ezemplu atu ukun, ninia reinu Dom Aleixo Corte-Real ne’e tama iha osan Portuges ninia tanba nia hatene ukun, sé malae mutin fó roto ba nia atu ukun la’os tanba nia matenek s2 ka s3, maibé tanba nia hatene ukun.
Lamukan, afirma, Tinan 20 ne’e ita haree, ita nia politika tinan 20 ne’e hanesan Futu manu, koko malu sé nia tara mak kroat liu, koko malu sé mak hatene liu fihir manu nia fulun, Demokrasia la’os ukun hanesan ne’e, demokrasia hili ema ho ibun badaen, ibun badaen tenki iha kapasidade atu haree, rona ema seluk.
“Hau sai Prezidente Republika, hau nia motivu mak, Hatan, asumi responsabilidade haluha ó nia-an simu responsabilidade. Haburas ka hamoris ambiente politiku ida ne’ebé ké ita Timor haree malu hanesan dadoli na’in sira uluk, ita la seluk la leet ida, mesak feto nian de’it mane nian de’it, entaun ita ba ukun ne’e serve atu hametin relasaun inan feton ninian, relasaun maun-alin ninian, la’os ita ba ukun lorloron ita sikut malu hela de’it, promove dialogu.” dehan, Lamukan.
Lamukan realsa atu sai Prezidente Republika iha kompetensia ida maka promulga orsamentu jeral estadu (OJE) no planu governu ninian, hanesan Prezidente Republika atu sai matan, tilun no ibun povu ninian, tenki utiliza ninia ibun atu komunika ho Xefe Governu, tanba governu mak responsavél ba ezekusaun orsamentu hodi halo dezenvolvimentu ba povu.
“Hau nia komunikasaun ho Primeiru Ministru ka xefe governu mak oinsa mak atu governu garante alokasaun orsamentu ba setór save sira hanesan, edukasaun, saude no agrikultura, dezenvolvimentu ne’ebé fokus ba Juventude.” tenik, Kandidatu PR, Nú. sorteiu 12.
Nia hateten kandidatu independente, kandidatu ida ne’ebé bele komunika ho partidu hotu-hotu. Entre solusaun ho problema ita tenki hili solusaun, sé ita hili problema ita mak beik duni, tanba hili ema ne’ebé problema ita hatene ema nia problema nusa ba hili, di’ak liu hili solusaun para hadia povu nia moris.
