Reportajen Zevonia Vieira
Prezidente Repúblika, Francisco Guterres Lú Olo, liuhusi Dekretu Prezidente Repúblika númeru 20/2022, nomea membru VIII Governu Konstitusionál na’in-rua atu simu posse.
Liuhusi komunikadu imprensa ne’ebe Neon Metin asesu husi palasiu prezidensia informa katak Prezidente Repúblika uza nia kompeténsia konstitusionál tuir artigu 106 númeru 2 halo nomeasaun ba membru Governu bazeia ba proposta husi Primeiru Ministru.
Membru Governu na’in-rua ne’ebé hetan nomeasaun husi Prezidente Repúblika mak hanesan Sekretáriu Estadu ba Terras no Propriedade, Eldino Rodrigues dos Santos no Sekretária Estadu ba Igualdade no Inkluzaun, Maria do Rosario Fátima Correia.
Prezidente Repúblika sei fó posse ba membru Governu na’in-rua iha Kinta feira, 31 Marsu 2022, iha Palásiu Prezidensiál Nicolau Lobato.
Liuhusi Dekretu Prezidente Repúblika númeru 19/2022, bazeia ba proposta Primeiru Ministru nian, Prezidente Repúblika ezonera Sekretáriu Estadu ba Terras no Propriedade, Mario Ximenes Sekretária Estadu ba Igualdade no Inkluzaun, Maria José da Fonseca Monteiro de Jesus.