Reportajen Santina Lucia da Costa
Eskola Bazika Sentral Katoliku Nossa Senhora Aitara Soibada (EBCC), iha tempu udan professor no estudante sira preokupa prosesu aprendizajen labele la’o, tanba eskola nia kondisaun grave, udan-been tama de’it, janela, Plafond, no kalén dodok no aat hotu ona.
Ba Neon metin, Professor Eskola Bazika Sentral Katoliku Nossa Senhora Soibada (EBCC), Napoleão da Costa de Jesus, hato’o preokupasaun katak, eskola katolika atensaun masimu husi governu laiha, buat hotu liuhusi konkordánsia data husi parte igreja ho estadu.
“Eskola ne’e temi katolika, maibé laiha atensaun husi governu, ami hein husi fundasaun mós to’o agora seidauk iha lampu hijau ida atu hadia eskola ne’e.”hateten, Professor EBCC Nossa Senhora Aitara Soibada, Napoleão da Costa de Jesus, Kinta-Feira, 7/4.
Professor Napoleão da Costa de Jesus, Dehan, Husi kedas tinan 2000 to’o agora eskola nia kondisaun mak hanesan ne’e hela de’it, laiha parte ida atu mai hadia, maske estudante sira remata husi eskola ne’e sai boot hotu ona, maibé nein ida atu mai tau matan.
“Kondisaun eskola mak hanesan ne’e, karik iha tempu udan ami tauk, anin boot ka rai nakdoko karik, eskola bele monu hanehan ami, liliu ba estudantes sira.” tenik, Napoleão da Costa de Jesus.
Professor Napoleão da Costa de Jesus, Akresenta, Fasilidade menus, tanba sala nia eskritóriu ne’e nia kondisaun gravé, liuliu ba meza, kadeira, armari.
Napoleão da Costa de Jesus, informa, dadaun ne’e provizoriu uza sala lima ba klasse 1 to’o 3, sala rua seluk aat total hela, ne’e mak iha ona planu atu hadia, maibé seidauk hadia to’o agora, akumula de’it estudantes klasse 1 to’o 2, no klasse 3 fahe ba A ho B.
Entretantu, Professor Napoleão da Costa de Jesus, realsa tan katak, kona-ba bee-moos sei falta, tanba sistema kanalizasaun laiha, estudante sira bainhira atu ba hariis fatin sira ba uza fali eskola publika filial nian.
Nia Rekomenda, ba kandidatu Prezidente Republika ne’ebé mak eleitu karik tau mós atensaun ba eskola katolika.
Iha Fatin hanesan, Professor Kontratadu, Mareliano Luis Xavier Soares, Reforsa tan katak, kondisaun eskola Nossa Senhora Aitara nia kondisaun gravé, eskola ne’e mós produz ona ema Timoroan matenek lubuk ida husi eskola ne’e, maibé nein ida atu mai tau matan.
“Husu ba estadu tau matan ba ami nia eskola katolika ne’e tanba ami nia eskola ne’e nia kondisaun gravé teb-tebes afeita ba professor sira no mós estudantes sira, sala sira kuaze dodok hotu ona.” dehan, Professor Mareliano Luis Xavier Soares.
Mareliano Luis Xavier Soares, husu mós ba governu se bele fó mós fasilidade hanesan komputadór, laptop, tanba iha materia ida siensia naturais no informatik iha extra kurikular ne’e estudante sira ne’e mós bele hetan siensia ruma husi komputador.
“Ita haree eskola sira iha Dili governu fó komputer, maibé eskola sira iha foho governu la haree hetan tiha. Ne’e duni ami husu ba governu bele fasilita ami hanesan komputador sira hodi fasilita estudante sira iha extra kulikuler.” hateten, Mareliano Luis Xavier Soares.
Mareliano Luis Xavier Soares Husu ba Prezidente Republika koalia ho governu tau matan netik ba sira nia eskola, tanba eskola kondisaun gravé liu presija Prezidente Republika koalia ho governu hodi tau matan ba eskola.
Entretantu, Estudante, Zensia Maia Soares Quintão, senti triste tanba eskola nia kondisaun gravé, Rai rahun barak, meza, kadeira, odamatan, Janela, kalen no plafon aat no dodok hotu ona.
“Ami estudante, ami senti triste tanba rai rahun barak, tinan barak ona seidauk hadia hela de’it. Kleur ona eskola nia kondisaun aat hanesan plafon mos dodok no monu hotu ona, kalen mos monu hotu ona. Ai sira mos mamar hotu ona, bainhira anin boot ami halai sai tanba ami tauk.” dehan, Estudante, Zensia Maia Soares Quintão.
Estudante iha Eskola Ensino Bazika Sentral Katólika Nossa Senhora Aitara Soibada (EBCC) hamutuk, 170. No Professores iha 12, Permanente na’in 9, kontratadu na’in 3, feto na’in 2 voluntariu.